Tanten no tin stabilidad na Venezuela, no por contempla reapertura di frontera

ORANJESTAD – Tanteno cu no tin stabilidad na Venezuela, Aruba no por contempla reapertura di frontera aereo cu e pais bisiña. Asina prome minister Evelyn Wever Croes a bisa diaranson mainta como reaccion riba e resultado di eleccion presidencial di Venezuela. ‘Ta dificil pa contempla pa habri frontera mientras cu e situacion ta instabiel” e mandatario a bisa. Aki dos siman ta reuni atrobe internamente y ta dicidi si ta prolonga e ciere cu actualmente ta vence fin di e luna di augustus. 

REFUGIA PA ARUBA

Pa basta tempo, e situacion tabata di tal indole cu hopi hende tabata usa Aruba como refugio, pa busca un miho bida na Aruba. Prome cu eleccion esaki tabata asina caba. A compronde cu despues di e eleccion, e situacion no a cambia y porta a bira te hasta pio, te ora cu tin siguransa di e situacion despues di eleccion. Como tal no ta mira cu por lo pronto lo habri e frontera aereo bek. Mirando cu aki dos siman ta reuni atrobe, ta mas probable cu e cierre di frontera lo por conta cu un prolongacion adicional.

SUSPENSION DI BUELO

Manera cu Noticiacla a raporta e siman aki tambe, a consecuencia di e reaccion di Republica Dominicano y Panama riba e situacion di Venezuela, e presidente di e pais bisiña a dicidi e ora pa temporalmente suspende tur buelo comercial entre Venezuela y e dos paisnan aki. Esey ta dificulta e forma di yega pa Venezuela un poco mas. Debi na e cierre di frontera, por a yega Venezuela via Panama y Republica Dominicano, y tambe Colombia. Awor ta keda solamente Colombia. For di Corsou por a yega, pero den avioneta y solamente pa estado Falcon. A compronde cu awor tin hasta problema cu e aeroliñanan y nan avion pa haci e buelo ey. 

CADA TRES LUNA

For di algun aña caba, gobierno di Aruba a dicidi cu ta mantene e frontera cu Venezuela cera, pa e situacion actual na e pais. Cada tres luna pa medio di un decreto, ta prolonga esaki y awor esey no ta diferente. E proximo prolongacion mester bin (si dicidi cu ta prolonga:red) fin di augutus y ta dura te cu november di e aña aki.