Barbados por keda descualifica pa FIFA

BRIDGETOWN – Tin chens cu e ekipo di futbol di Barbados cu a gana Aruba diadomingo, por keda descualifica y elimina di e torneo di cualificacion di FIFA. Asina e corant di Barbados, ‘NationNews” ta raporta awe mainta. Ademas, fuera di descualificacion, e por wordo seriamente multa pa a laga un un hungador ‘illegal’ hunga den e partido di diadomingo ultimo. No ta conoci si dado caso descualifica Barbados, cu Aruba tin un chens atrobe. 

HUNGADOR ILLEGAL

Barbados a gana e partido diadomingo 1-0, despues di nan victoria di 2-0 na Aruba. Como tal nan a avansa pa e di tres ronda. Sinembargo, tur esaki ta parse envano segun investigacion haci pa NationSport. Ta parse cu e medio campo Hadan Holligan cu a score e unico goal, mester a wordo exclui di hunga, pasobra e lo a haya dos carchi heel. Segun informacion di wega, Holligan a haya su prome carchi den di prome ronda contra US Virgin Islands, y a haya su di dos durante e prome wega entre Aruba y Barbados.

CARCHI HEEL

A compronde cu secretariado di Barbados Football Association (BFA) a wordo informa oficialmente di e inhabilidad, pero e informacion no a wordo pasa pa e gerencia y parti tecnico di e ekipo. Mientras cu e lo mester tabata informacion comun dentro di e ekipo cu Holligan tabatin dos carchi heel, e manager Adrian Donovan no a biaha cu e ekipo pa Aruba.

RETIRO HARRIS

Den un otro problema, mientras cu no a haci un anuncio oficial, un reunion di ultimo ora lo a tuma lugar dialuna anochi na e oficina di BFA, unda cu e presidente Randy Harris lo a indica cu e ta retira di su funcion den cuadro di e posibel descualificacion di e wega. E corant ta raporta cu e no a logra contacto cu Donnovan ni Harris riba e topico aki.Lesa e articulo original aki.