Na Corsou, tres ambtenaar di Censo (Kranshi) tin ‘obhecion’ pa casa hende di mesun sexo

WILLEMSTAD - Tres ámtenar di Kranshi (Registro Sivil), tin “opheshon” pa kasa pareha di mesun sekso. Sindikato ABVO tin di sinta papia atrobe ku e trahadónan i e hefe di Kranshi, sr. Gregory Wilson di ABVO a bisa EXTRA.

Sr. Wilson a indiká ku e desishon di korte di kasashon ku pareha di mesun sekso por kasa na Kòrsou, a trese su kos kuné, kaminda tres ámtenar no ta sinti nan mes apto pa kasa e parehanan di mesun sekso, dor ku esaki lo ta bai kontra di nan standart di moral. E trahadónan no a aserka sindikato dirèkt, pero a bai serka nan hefe. Ta e hefe di Kranshi ku a pone sindikato ABVO na altura dje situashon i a pone e diferente senarionan riba mesa pa ku e asuntu aki. Siman pasa djabièrnè ABVO a sinta huntu ku minister i e trahadónan, kaminda a elaborá riba e asuntu aki, pasombra ta un sentensia di korte mas haltu, i e ta ke pa direktiva di ABVO duna su opinion. Despues di djabièrnè último a palabra ku e trahadónan ku aki tres siman lo sinta papia ku nan, kaminda ABVO lo pone su posishon pa ku e trahadónan konforme loke a palabra.

Mas aleu sr. Wilson a bisa ku direktiva dje sindikato no a yega kaminda nan lo aserka abogado riba e sentensia i e situashon dje trahadónan. Mester determiná si ta buska abogado pa ta presente. Sinembargo den direktiva di ABVO tin hurista si, i nan a haña tòg basta bon konseho. Wilson ta kere ku e ámtenar por nenga di kasa hende di mesun sekso. “Si algu ta mishi ku mi norma, balor i moral e trahadó mester por bisa e no ta hasi tal kos”, segun Wilson. E ta bai mas leu ku kisas serka hende hasta si e ehersé e kasamentu di mesun sekso kontra di su moral, e lo por keda molestiá e hende. Komo hende ta tolerante, pero mester respetá derecho dje hende. No mester lubidá ku ora e trahadónan a kuminsá traha e trabou, e asuntu aki no ta diskutibel. Pero sr. Wilson ta kere ku mester yega na un situashon di gana-gana. Finalmente sr. Wilson a bisa ku e situashonnan aki ta krea senario pa parlamentu traha lei pa ora un lei ta kontra dje ámtenar su moral, e por haña eksonerashon pa hasi tal trabou. Aki atrobe tin trabou pa parlamentu. NOTA: Texto ta scirbi den Papiamento fonetico di Corsou.