- Minister Hulandes di Husticia van Weel a bishita wardanan di polis na Aruba awe
- Van Haasen(PVV): Bergonsoso cu na Corsou, partido lidera pa hende cera den prizon, ta bay eleccion
- Veldkamp: Hulanda lo actua contra Venezuela despues di expulsion di diplomaticonan
- Feco Gomez(AMAK): Arubianonan ta participa atrobe den festival di Tumba di Corsou
- Zoetrum (CTB): Corsou tin un sin fin di actividad pa Arubianonan den 2025
Delegacion di Arubahuis na ultimo despedida pa palanca di Asosacion Nos Baranca na Hulanda Mena Maduro
DEN HAAG – Na St. Lucas Kerk na Tilburg a tuma lugar un misa pa tuma despedida di Filomena (Mena) Maduro. Pa hopi aña Mena a fungi como presidente di Asociacion Nos Baranca cu entre otro tur aña tabata organisa e Festival di San Juan/Dera Gai.
Hopi hende a presencia e ceremonia special aki y entre nan, Minister Plenipotenciario mr. Ady Thijsen, directora di Gabinete di Aruba Joselin Croes LL.M. Msc. Nuris Dabian, mr. Shandra John, Ivonne Navas y Sidney Kock.
Mirando e relacion estrecho cu Mena como presidente di Nos Baranca tabata tin cu Gabinete di Aruba, tabata tin e oportunidad pa Minister Thijsen a hiba palabra. Sr. Thijsen den su discurso a referi na e historia di Nos Baranca cu a wordo lanta riba 3 di December 1989. Mena den e prome periodo tabata voluntatio pa Nos Baranca, cu tabata tin como meta pa proteccion di interes y duna sosten na e comunidad Arubiano na Tilburg y vecindario. ‘Despues di a drenta den e directiva di Nos Baranca, Mena na 1993 a bira presidente di Nos Baranca. Mena pa mas cu trinta aña a bringa na interes di Arubianonan y tambe a haci posibel cu e Arubiano por a celebra su cultura den forma di actividadnan, manera e Festival di San Juan/Dera Gai. Tambe ela organisa otro actividadnan social y educativo. Mena semper tabata para cla pa yuda hende. Mena tabata scerpi, energico, responsabel y servicial. Mena tabata tin un curazon grandi. Na momento cu no tabata tin suficiente financiamento pa organisa San Juan, Mena ta pone su mesun placa pa asina sigura cu e Festival toch por sigi. Y den esaki semper e por a conta cu e sosten di su esposo y su yuinan,’ segun Minister Thijsen.
E mandatario a sigi bisa cu Mena tabata tin contacto cu diferente organisacionnan, cu municipio di Tilburg y sigur cu Gabinete di Aruba. Mena pa hopi hende tabata fungi como advisor. Minister Thiijsen: ‘Hopi di nos aki na Hulanda, pero principalmente na Tilburg y specialmente studiantenan a conoce Mena di cerca. Hopi di nan a regresa Aruba y ta ocupa puestonan halto na Aruba. Di otro banda Mena a sabi di intrega su mes den e comunidad Hulandes. Ela traha na diferente instancianan na Tilburg y tabata “beheerder” na diferente centronan di bario na Tilburg. Asina ela cera conoci cu hopi hende. Un cos Mena a siña nos, pa ta orguyoso di nos cultura Arubiano y banda di esaki pa nos tambe bira parti di e comunidad Hulandes. Mena tabata un persona ehemplar cu nunca nos por lubida,’ tabata palabranan di Minister Plenipotenciario di Aruba Ady Thijsen durante di misa pa tuma despedida di Mena Maduro.
Van Haasen(PVV): Bergonsoso cu na Corsou, partido lidera pa hende cera den prizon, ta bay eleccion
DEN HAAG – Ta bergonsoso cu partido politido KEM na Corsou, a apunta su lider Lo Martinez como lijsttrekker, esta pa lidera e lista politico pa e proximo eleccion, siendo cu e persona tin un luna cera caba den prizon, pa sospecho di corupcion. E miembro di Tweede Kamer pa partido PVV Peter van Haasen, a cuestiona e secretario di estado Hulandes Szabó riba e tema aki durante un debate riba islanan CAS diaranson mainta. Segun e miembro di PVV, a spera un intermediacion di parti di Hulanda, pero Szabó a splica cu e no por intermedia den e asunto aki. E ta compronde si cu den e debate di awe mainta, no tin sosten pa e acto cu a tuma lugar na Corsou.
Veldkamp: Hulanda lo actua contra Venezuela despues di expulsion di diplomaticonan
DEN HAAG - Como contesta riba e expulsion di varios diplomatico Hulandes for di Venezuela e siman aki, minister di Relashonnan Eksterior Hulandes Veldkamp a yama e encargado di asuntunan Venezolano (un hende cu ta tuma e tareanan di un embahador) ‘op het matje’. Veldkamp ta yama e desaroyonan un escalacion cu ta haci e dialogo mas complica ainda.
Dies caso di contaminacion pa a come blueberry di Albert Hein na Hulanda
AMSTERDAM - Diez persona a raporta na Albert Heijn ayera nochi laat cu nan a bira malo despues di a come blueberry. E cadena di supermercado a anuncia un retiro grandi despues cu por lo menos diesdos persona a keda infecta cu hepatitis A despues di a consumí blueberry congela.
Van Dijk (NSC) a bira presidente di Comision di Relashonnan di Reino pa Tweede Kamer
DEN HAAG – Olger van Dijk (NSC) ta e presidente nobo di Comision di Relacionnan den Reino di Camara di Representantenan (Tweede Kamer). El a haya 4 di e 6 votonan emiti. Oponente Songül Mutluer (GroenLinks-PvdA) – e presidente interino te ku awe – a risibí 1 voto. E comision aki ta atende cu asuntonan cu ta regarda e.o. asuntonan di Aruba, Corsou y St Maarten y islanan BES. Esaki ta haci su posicion di importancia pa nos.
Secretario di Estado pa Asuntonan di Reino Zsolt Szabó a firma registro di condolencia
DEN HAAG – Secretario di Estado pa Asuntonan di Reino Zsolt Szabó a firma e registro di condolencia na Gabinete di Aruba pa ex-prome Minister Henny Eman kende riba 6 di Januari ultimo a fayece na e edad di 76 aña.
Zsabó: ‘No tin luga pa corupcion den e paisnan Caribense di Reino’
DEN HAAG – Corupcion, minamento di confiansa publico, y otro formanan di criminalidad no tin luga den un estado constitucional, segun Zsolt Zsabó, Secretario di Estado di Relashonnan di Reino Hulandes. Zsabó a enfatisá su compromiso pa promove bon gobernacion y fortalese estado di derecho den colaboracion cu e paisnan Caribense denter di Reino Hulandes.
Follow NoticiaCla
