Organisacion di refugiado ta anticipa ola nobo di Venezolano cu lo huy for di nan pais

WILLEMSTAD – Organisacionnan di refugiado manera Refugees International ta prepara pa un ola nobo di Venezolano  cu lo huy for di nan pais despues cu presidente actual Nicolas Maduro a keda declara ganado di e eleccion di diadumingo door di su mes funcionarionan di gobierno. Segun informenan oficial cu no a wordo revisa pa organisacionnan internacional segun e organisacion di refugiado, Maduro a ricibi 51% di e votonan compara cu 44% pa lider di oposicion María Corina Machado.

E resultadonan di eleccion ta para den contraste fuerte cu e encuestanan independiente segun e organisacion , pero hopi tabata spera caba cu e conteo di voto lo wordo manipula pa sigura e victoria di Maduro, nan ta sigui bisa. “Den e ultimo lunanan, tabatin un briyo di speransa bou di oponentenan di su regimen autoritario. Sinembargo, awor tin miedo tocante e reaccion potencial di forsanan di seguridad si protestanan na gran escala surgi”

Segun e organisacion , hopi di e 7 miyon Venezolano cu a huy pa exterior tabata soña di regresa nan cas. Sinembargo, awor ta anticipa un exodo nobo. Den e ultimo añanan, segun e organisacion di refugiado, un calculacion di 30.000 Venezolano a busca refugio na Curaçao y Aruba, unda nan ta wordo considera ‘ilegal’. Organisacionnan di derechonan humano regularmente ta bati alarma riba e trato inhumano cu nan ta enfrenta na e luganan aki