Venezuela a suspende tur buelo comercial cu Panama y Republica Dominicano

CARACAS – Pa esnan cu kier yega Venezuela for di p.e. Aruba, bo por  haci esaki awor solamente bulando via Colombia (avion grandi pa Caracas) of Corsou ( avion chikito pa estado Falcon). Esaki pasobra entrante diaranson awor, Venezuela ta suspende buelonan comercial di Panama y Republica Dominicano temporalmente. Esaki tabata e forma cu bo por a yega Venezuela, esta via Panama y of Republica Dominicano. 

CANCIYERIA DI VENEZUELA

Canciyeria di Venezuela dialuna a confirma e cambio aki pa Noticiacla. “Den rechaso di e metemento di gobiernonan di hala dererechista y basa riba soberania completo, nos ta anuncia e suspencion temporal di buelonan comercial, pa y for di Republica Bolivariana di Venezuela cu Panama y Republica Dominicano” e comunicado di Canciyeria ta bisa. Esaki ta drenta na vigor entrante diaranson awor. 

RELACION DIPLOMATICO

E accion aki ta e contesta di Venezuela contra e.o. e hecho cu e dos paisnan menciona, a kibra relacion diplomatico cu Venezuela, basa riba nan reclamo pa e proceso electoral presidencial di diadomingo ultimo. Como contesta, Venezuela a dicidi di e ora suspende e buelonan comercial. 

CONSECUENCIA

E consecuencia di e accion aki ta pone pues cu esnan cu kier yega Venezuela desde p.e. islanan ABC, of otro parti di Caribe, mester haci esaki awor via sea Corsou (cu avioneta pa estado Falcon) of via Colombia. Esaki ta e unico forma cu un persona por drenta Venezuela. Esaki ta conta tambe pa esnan cu ta biaha pa Merca for di y pa Venezuela. Desde cu Aruba a cera frontera cu Venezuela, si bo kier a yega Venezuela, bo mester a biaha via Panama, cu COPA, of Republica Dominicano. E unico opcion awor, por lo pronto, ta pues via Colombia.