Gobierno di Aruba preocupa pa transparencia den resultado di eleccion presidencial na Venezuela

ORANJESTAD –Gobierno di Aruba ‘ta preocupa pa e desaroyonan mas recien y ta haci un apelacion pa transparencia completo den e proceso electoral y den e maneho di e resultado’. Esaki tabata e prome reaccion di gabinete Wever Croes dialuna despues di e resultado di eleccion presidencial na Venezuela dialuna marduga. Manera ta conoci, Conseho Nacional Electoral (CNE) a declara algo pa mei anochi dialuna, cu actual presidente Nicolas Maduro a keda re-eligi cu 51% di e votonan conta na su fabor contra 44% di e votonan pa e contrincante Edmundo Gonzalez. 

VOTAMENTO MASAL

Den e declaracion riba e pagina di Facebook di Gabinete Wever, ta sigui bisa cu ‘diadomingo 28 di juli 2024, e pueblo Venezolano a sali masalmente pa vota’. Tambe cu ‘Gobierno di Aruba ta di opinion cu e boluntad democratico mester wordo respeta’. Esaki ta mustra cu gobierno di Aruba tin indicacion cu e resultado posiblemente no ta e loke cu a keda presenta, y cu tin algo su tras. 

HULANDAManera ta conoci, relacionan exterior ta un asunto di Reino, unda cu Hulanda ta esun cu ta manda riba e tereno aki. Ainda te cu awor, gobierno Hulandes (di Reino) no a opina riba e tereno aki, pa bisa si e ta reconoce e gabinete Maduro despues di e resultado di e eleccion ultimo. Varios otro pais (manera cu Noticiacla a raporta caba) dialuna a expresa nan desaprobacion pa cu e resultado, mientras cu otronan si a duna nan sosten y aprobacion y felicitacion.