Ex director na OM: Registracion y administracion di directiva na DIP ta lew di ta ideal

ORANJESTAD – E registracion y administracion na directiva di DIP ta lew di ta ideal. Asina director di DIP Haime Croes ta bisa durante su interogacion un aña pasa na Ministerio Publico pa e caso penal Kukwisa, segun un carta cu a cay den man di Noticiacla recientemente. E caso ta realta un investigacion di Landsrecherche riba sospecho di mal uso di poder di minister pa cu otorgamento di tereno particular huurgrond door di e tempo ey minister Marisol Tromp. E tempo ey Croes tabata director di e departamento DIP. Ademas,- segun e carta -, e director ta bisa cu segun e, tin trahado cu ta yuda clientenan mientras cu esaki no ta bay segun procedura. E la bisa te hasta cu ‘min no ta tribi di hinca mi man den candela pa tur e personal cu ta traha aki’. Tambe, e la declara cu e lo ta atende por lo menos 125 caso pa dia riba tur tipo di tema. Como tal tabata duda den su capacidad pa por a atende cu su tarea primordial cu ta dirigi e compania. Esey ta un di e puntonan cu a resalta den e carta di e PG e tempo ey na prome minister. 

CASO KUKWISA 

E awor ex director tabata bou investigacion di OM, basa riba kehonan riba su prestacion. Segun e kehonan, e director lo a crea un sistema ‘fantasma’ unda cu otorgamento di e terenonan, tabata wordo tapa pa di e resto di personal di DIP. Riba 18 di juni 2021 a inicia e investigacion  den e edificio di DIP. Durante e investigacion aki e director di e tempo ey a wordo scucha tambe. Durante e investigadion, segun PG den e carta na prome minister, e director a desmenti di e acusacion contra su persona. E la bisa e momento ey tambe cu durante e pandemia, e minister di e tempo ey a duna orden pa duna tereno huurgrond di un forma acelera pa agricultura. “Y como cu e minister no tabata haya cu e cos tabata bay suficientemente liher, e tabata pasa cu un lista di nomber di hende na ken mester a otorga e terenono y cu nan mester a haya preferencia”, e PG a bisa den e carta. Segun e PG, e director tabata considera esaki como patronahe politico y a nenga den prome instante pa coopera. “A base di e declaracion aki di sr Croes, e ex minister tambe a bira sospechoso”. 

CASI SEPONI 

E caso contra tanto Croes y e ex minister despues a keda seponi, pasobra no tabatin suficiente prueba contra e director e tempo ey. Y pa loke ta e ex minister, a seponeer e caso contra dje pasobra ‘e la wordo declara un sospechoso inhustamente. Den e investigacion, no tabatin hecho of circumstancia cu a sostene e declaracion contra e minister cu Croes a haci”.  Actualmente tin un persona cu temporalmente ta na cabez di e departamento aki. 

E CARTA

E carta en cuestion pues, tabata uno di e ex PG dirigi na prome minister riba e situacion di e director e tempo ey. Segun e carta, prome minister tabata en busca di mas informacion riba e caso Kukwisa, relaciona cu medidanan disciplinario cu e kier a tuma contra e director. E PG a informa e premier cu pa haci peticion asina, lo mester tin motibonan hopi urgente y pisa pa haci tal. ‘Asina mes, y teniendo cuenta cu e proteccion di e persona en cuestion, mi por informabo pero cu cierto reserva”, e PG a bisa.