Paisnan Latinoamericano kier claridad riba resultado di eleccion di Venezuela

MIAMI - Hopi pais Latino Americano ta critico riba e resultado di e eleccionnan presidencial na Venezuela. Presidente actual Maduro a reclama victoria, algun ora despues cu e urnanan a cera. Esaki lo marca su di tres periodo como presidente. Pero oposicion ta bisa cu e candidato contrali González a gana pa forsa mayor y cu tabatin manipulacion.

“No asina! Tabata un secreto abierto cu nan lo ‘gana’ sin importa e resultado real,” presidente Uruguayo Lacalle Pou a bisa di e partido socialista di Maduro, Partido Socialista Unido de Venezuela (PSUV). “Henter e proc eso di eleccion tabata claramente defekto.”

Peru a retira su embahador for di Venezuela pa consultanan. “Mi ta condena den e terminonan mas fuerte e colecion di iregularidadnan aki,” asina Minister di Relacionnan Exterior González-Olaechea a bisa. Costa Rica tambe ta rechasa e resultadonan di eleccion, mescos cu presidente Chileno Boric. “E regimen di Maduro mester realisa cu e resultadonan cu el a publica ta dificil pa kere.”

‘No reconoce fraude nobo’.

Presidente Argentino Milei a bisa ainda prome cu e resultadonan a wordo anuncia cu e no ta di acuerdo cu e rumbo di e sucesonan. “Argentina lo no reconoce e fraude nobo aki,” el a bisa, referiendo na e eleccionnan di 2018, caminda iregularidadnan tambe a wordo raportá. “Nos ta spera cu e biaha aki forsanan arma lo defende democracia y e boluntad di pueblo”.

“Nos ta kere cu ta esensial pa cada bos wordo skucha,” asina Minister di Asuntunan Exterior di Colombia Murillo a bisa. E kier pa tur duda riba e resultadonan wordo kita y pesey ta boga pa un investigacion independiente riba e eleccion. Presidente Arevalo di Guatemala ta kere cu Venezuela merece resultadonan transparente y exacto cu ta refleha e boluntad di pueblo. “Nos tin hopi duda riba e resultadonan anuncia pa e comision electoral”.