Formalisacion ley di CAFT coriendo retraso serio y peligroso

ORANJESTAD – E formalisacion di College Aruba Financieel Toezicht (CAFT) ta core peliger pa keda cla na tempo. Informacion cu NoticiaCla.com tin, ta cu e proceso pa e formalisacion di CAFT ta coriendo un retraso serio y peligroso. Y si esaki no keda cla na tempo pa drenta na vigor 1 di augustus proximo, e tin consecuencia serio pa gobierno di Aruba segun e protocol firma 2 di mei ultimo.

PROTOCOL

Ora cu Hulanda a firma e protocol cu Aruba 6 siman, e acuerdo tabata cu pa si e fecha menciona, CAFT no ta ‘operacional’, e lo ta violando e protocol, pa cual Hulanda lo tuma e medidanan necesario. For di momento cu e protocol a keda firma, partidonan a keda keto (ainda) y e proceso mester a cuminsa cana su caminda. Pero awor ta parse cu tin un retraso serio di parti di Aruba, cu ya caba siman pasa a conoce su prome ‘obstaculo’.

CANDIDATONAN CAFT

Diabierna ultimo tanto Aruba como Hulanda mester a presenta nan candidatonan cu lo forma CAFT. Hulanda a presenta (segun palabracion) su candidato y tambe esun di Reino. Aruba no por a haci esaki y a priminti cu den e proximo Rijksministerraad e lo haci tal. Hulanda a, cumpliendo tambe cu e protocol, aproba pa Aruba haci prestamo pafo di Reino. Den e carta firma pa Plasterk diabierna, e la bisa cu ‘e ta wardando e informacion di progreso for di Aruba’.

RAAD VAN ADVIES

Siman nobo a habri y awor ta resulta cu e ley cu mester formalisa CAFT, no a yega Raad van Advies ainda. Contrario na otro leynan cu ta tuma menos tempo pa e organo consultativo formula su conseho, esun di CAFT esta LAFT (Landsverordening Aruba Financieel Toezicht), mester di un tempo extenso pa keda cla. Y a compronde cu esaki lo tuma por lo menos 2 luna unabes cu e organo consultativo ricibi esaki.

PARLAMENTO

Diabierna ainda NoticiaCla.com a compronde for di presidente di parlamento Marisol Lopez Tromp cu bentana di oportunidad pa trata e ley prome cu reces, ta birando hopi chikito. Esaki si tene na cuenta cu menos cu 4 siman parlamento ta bay cu reces y cu no tin reunion mas despues. E no por a confirma cu e ley aki ta cay bou di e regla di ‘casonan urgente’ pa cual bou di reces mes, parlamento por wordo yama pa trata esaki ainda prome cu 1 augustus. “Nos no a haya nada y ta te ora cu nos haya e ley, e ora por programa su tratamento” Lopez a bisa. Y ainda esey ta nifica cu mester di tempo pa tur parlamentario haya chens pa prepara pa esaki manera ta e caso cu tur otro ley.

FONDO ENSEÑANSA

Un ehempel ta cu e ley di fondo di enseñansa cu si a yega parlamento, mester a wordo trata siman pasa caba, pero esaki ainda no ta riba agenda mes. Pues hasta e ley aki, no por a keda trata, corda uno cu no a ni yega Raad van Advies. Rumornan ta coriendo cu e siman aki Aruba por pidi Hulanda pa un ‘uitstel’ pa e introduccion di CAFT, mirando e tempo cu no ta suficiente pa keda cla ‘prome cu 1 augustus’.