- Iberostar Beachfront Resorts a presenta su Shoco Boulevard
- Deportista Arubiana cu a keda paralisa despues di accidente na Merca, buscando fondo pa yuda cu gasto
- Director di SETAR, Roland Croes ta invitado di Noticiacla LIVE awe nochi
- Liberalnan Canades ta gana eleccion, danki na Trump
- Pleito interno den OM di Aruba, posibel motibo cu caso Holloway no a keda soluciona
Segun gobierno, ‘por lo pronto’ no ta contempla pa aumenta edad di pensioen
ORANJESTAD – Gobierno di Aruba a bisa diabierna cu ‘por lo pronto’ e no ta contemplando pa aumenta e edad di pension. Un dia prome, Noticiacla a raporta cu di parti di sindicato TOPA, ta bay hiba gobierno corte y esaki ta un di e temanan. Mientrastastanto, gobierno ta sigura cu su compromiso ta pa garantisa cu e fondo di pensioen di biehes di AOV ta solido. Pa esaki ya desde 2017 Gabinete Wever-Croes a haci tur posibel pa drecha e situacion financiero grave cu nos pais tabata aden, pa asina crea posibilidadnan pa futuro y pa fortifica nos fondo di pensioen.
HULANDA SU EXIGENCIA
Gobierno a recorda cu na aña 2020 ora Aruba a wordo confronta cu e pandemia, Covid 19, y pa por sobrevivi, Aruba mester a presta placa di Hulanda. E placa aki tabata necesario pa yuda henter comunidad, entre otro pa e subsidio di salario pa tur trahado y FASE pa esnan cu a perde trabou y pakete di cuminda pa esnan den necesidad. “Manera tur hende por corda, e fiansa aki no a bin sin mas. Hulanda a bin cu exigencianan draconico pa presta Aruba placa durante pandemia. Un di e condicionnan tawata ta cu e edad di pensioen mester subi pa 66 of 67 aña” gobierno a sigui bisa. Gobierno a negocia hopi largo riba e punto aki. Di un banda, Gobierno tabata tin mester di e fiansa pa por yuda nos ciudadanonan sobrevivi. Pero di otro banda Gobierno no kier a acepta e condicion di hisa edad di pensioen sin mas.
PALABRACION HACI CU HULANDA
Na aña 2025 lo haci un estudio pa mira (1) si e fondo di pensioen di AOV ta solido. Si e ta solido, no mester tuma ningun paso. (2) Si resulta cu e fondo no ta solido, Aruba lo tuma e decisionnan necesario pa mantene e fondo solido. Pasobra sino, e fondo ta kibra y no por paga pensioen mas na pensionadonan cu a paga premies pa hopi aña.
Tin varios decision cu Gobierno por tuma si en caso e fondo ta exigi esaki. Un di nan por ta aumento di e edad di pensioen. Un otro ta aumento di e premies, entre otro. Hecho ta cu na e momento aki Gobierno no ta contemplando pa hisa e edad di pensioen, y lo haci e investigacion na 2025. Por lo tanto edad di pensioen no ta bay hisa awor manera algun hende ta sugeri. Lo haci investigacion prome y lo evalua tur alternativa prome cu hisa edad di pensioen.
Compromiso di Gabinete Wever-Croes ta pa garantisa cu e fondo di pensioen ta solido pa garantisa cu esnan cu awe ta traha y paga premie, tambe por goza di e pensioen aki den futuro.
DIMP a contesta De Meza dialuna pero abogado no ta duna comentario mas
ORANJESTAD – Departamento di impuesto (DIMP) a cumpli cu e demanda di parlamentario Mike de Meza pa manda un carta positive p’e. Kico e contenido ta, no ta conoci pa noticiacla ya cu e abogado a opta awor pa no duna mas comentario. “Sorry, awe si ta no comments” e abogado Desiree Croes a reacciona pa Noticiacla dialuna atardi despues di cu e deadline a vence. Inicialmente a informa cu lo a bay entama un caso sumario awe diamars of mas tarda diaranson. Sinembargo, algun rato despues, cos a cambia, ora cu a bira conoci cu ‘toch’ un reaccion a drenta di parti di DIMP. Pero ora cu a puntra kico ta bay sosode awor, cu e contesta a drenta, e abogado a opta pa no duna mas comentario. Pues no ta sigur kico e contesta tabata.
Gabinete AVP-FUTURO a pidi Szabó reconsidera decision pa aumenta tasa di interes
ORANJESTAD – Gabinete AVP-FUTURO a pidi secretario di estado hulandes Szabó pa reconsidera su decision pa aumenta e tasa di interes pa e pago di debe di Covid. Specificamente ta sugeri pa aplasa e tempo cu 6 siman, den cual partidonan lo mester keda cla pa entrega e concepto di e rijkswet nobo pa supervision financiero.
Raportahe fotografico di e bishita di Eerste y Tweede Kamer na Conseho di Minister di Aruba
ORANJESTAD – Manera cu Noticiacla a raporta anteriormente caba, awe mainta e delegacion di tanto Eerste como Tweede Kamer di Hulanda a bishita Conseho di Minister. Esaki ta mas di raportahe grafico di e bishita.
MEP a pidi Gerlien Croes pa stop di colga na saya di Evelyn Wever-Croes
ORANJESTAD – Como reaccion riba e critica di actual minister Gerlien Croes na ex premier Wever-Croes cu su videonan bunita pero cu e ta esun responsabel pa e tardansa den e proceso di RAFt nobo, e partido a sali na defensa di su lider Wever Croes y a pidi sra Croes pa no colga na su saya. Di un banda, e partido ta considera cu e ta un honor cu srabGerlien Croes kier colga na saya di sra Wever-Croes pasobra cu e legado cu e ta laga atras ta grandi. Y sra Gerlien Croes basicamente ta confirma esaki segun e partido geel.
Wever: No tin motibo pa panico riba desaroyo di tarifa introduci na Merca
ORANJESTAD - Awemainta minister Geoffrey Wever ta den Parlamento di Aruba, den un Openbare Bijeenkomst a informa miembronan di parlamento y pueblo tocante e desaroyonan di Tariffs implementa na Merca y nan posibel impacto pa Aruba. Segun e mandatario, ta importante pa pueblo sa cu minister Wever ta den dialogo cu e stakeholdernan, y ta prepara pa por adapta si acaso ta necesario den cualkier eventualidad. Na e momento aki no tin motibo pa panico, pero si pa keda cauteloso - y nos lo keda prudente cu maneho financiero!
Conseho di minister a reuni cu miembronan di Eerste y Tweede Kamer di Hulanda
ORANJESTAD – Miembronan di Eerste y Tweede Kamer di Hulanda, presidi pa Martin Bosma, a reuni cu Conseho di Minister di Gabinete AVP- FUTURO dialuna mainta. E delegacion ta na Aruba pa actualisa nan mes riba e situacion na Aruba y conoce e gobernantenan nobo.
Follow NoticiaCla
