AZV: Con haci pa ta cubri pa AZV ora di cuido di docter di cas

ORANJESTAD – Un biaha mas AZV a splica e proceso con pa haci pa ta cubri pa AZV ora di cuido medico di un docter di cas. Pa haya cuido medico di un dokter di cas y pa haya esaki cubri door di AZV, e asegurado mester ta inscribi riba nomber di su dokter di cas den e administracion di AZV.

ROL DI DOKTER DI CAS

E dokter di cas di e asegurado di AZV, ta e persona autoriza pa evalua y of samina e asegurado. Tambe e dokter di cas di e asegurado ta esun cu por duna un referencia pa un specialista of pa otro tipo di cuido (p.e. test di sanger na laboratorio).

OTRO CUIDO

Tur otro cuido ta wordo cubri door di AZV bou di e condicion cu esaki ta wordo pidi door di e dokter di cas di e asegurado (es decir cu mester tin un carta di referencia pa haya otro cuido). E unico excepcion riba e regla di referencia aki ta pa: Spoed Eisende Hulp; Cuido y guia di un partera; Cuido dental y; Cuido di un higienista di boca.

CONTACTO PARTICULAR

Den tur otro caso, ora un asegurado no ta cumpli cu e rekisitonan akiriba menciona, AZV ta considera e contacto como uno particular. Esaki ta nifica cu e gastonan medico genera pa medio di un contacto particular no ta cay bou AZV. Igual ta conta tambe pa tur e gastonan medico cu ta wordo genera despues di e contacto particular. E gastonan ey tampoco no ta wordo cubri door di AZV.

AZV ta duna algun ehempel.

Scenario 1:

Na momento cu como asegurado bo ta consulta cu un dokter di cas cu no ta bo propio dokter di cas (cu excepcion di e reemplazo oficial di bo dokter di cas), esaki ta wordo considera un contacto particular. Esey ta nifica cu e gastonan di e consulta cu e dokter di cas ey ta pa e asegurado su propio cuenta. Tambe tur otro gasto haci despues y en conexion cu un referencia di e dokter di cas aki. Por ehempel remedi cu wordo prescribi of test di laboratorio.

Scenario 2:

Na momento cu como asegurado bo ta consulta cu un specialista y esaki tabata a base di un contacto particular (paso por ehempel tabata bo propio decision pa bay consulta cu e specialista aki), e gastonan di e specialista aki, igual cu tur gastonan en conexion cu un referencia (p.e. test di laboratorio) di e specialista aki, ta cay pa bo propio cuenta.

CONTACTO

AZV ta spera cu tur asegurado tuma bon nota di e informacion aki. Gastonan medico genera door di contacto particular cu toch wordo declara na AZV, AZV ta recupera cerca e dunadonan di cuido of cerca e asegurado mes.

Pa cualkier pregunta por yama na 5279900 of 5840030.