Medidanan drastico pa garantisa seguridad durante eleccion na St. Maarten

W’STAD/PHILIPSBURG - Konseho di Minister di St. Maarten a tuma un kantidat di medida pa garantisá seguridat di un i tur durante temporada di kampaña ku ta aden i pa riba dia di elekshon mes ku ta 19 ougùstùs awor. Ta prohibí benta di alkohòl riba dia di elekshon i ta prohibí aglomerashon di hende tantu riba dia di elekshon komo den e periodo di kampaña promé ku elekshon.

Esaki den kuadro di e kaso di tiramentu dia 17 yüli kaminda lider di partido OMC, Olivier Arrindell tabata envolví i e dama ku tabata huntu kuné e anochi ei a fayesé a konsekuensia di heridanan di bala ku el a sufri.

Promé ku e kaso aki a mira kaba un oumento den kasonan di violensia na St. Maarten ku uso di arma di kandela. Pa e motibu aki promé minister demishonario, Luc Mercelina a bisa ayera durante e konferensia di prensa di konseho di minister ku ta prohibí benta di alkohòl riba dia di elekshon.

Tampoko lo permití aglomerashon di grupo di simpatisante polítiko na e urnanan elektoral riba dia di elekshon. Mercelina ta bisa ku e no ke pa siudadanonan sinti nan mes intimidá, menasá òf influensiá ora e ta bai vota. “E siudadano mester por hasi su eskoho den tur trankilidat.”

Mas aleu Mercelina a anunsiá ku no ta permití mas pa tene reunionnan públiko den temporada di kampaña. Reunionnan públiko den airu liber ta popular ainda na St. Maarten komo un manera pa kore kampaña i komuniká ku gruponan grandi di siudadano.

Mercelina a bisa ku gobièrnu a disidí ku no ke aglomerashon di hende kaminda ta krea situashonnan menasante miéntras no por garantisá seguridat di esnan ku ta asistí na e reunionnan aki. E promé minister demishonario ta atmití ku ta trata di medidanan drástiko.

E medidanan ta radikal, Mercelina ta atmití, pero na su opinion mester tuma esakinan pa garantisá seguridat di poblashon di St. Maarten den e periodo elektoral ku ta aden.

Militar

Despues di e kaso di tiramentu ku morto di 17 yüli último Mercelina ta bisa ku e siguiente dia e tabatin reunion di krísis ku Ministerio Públiko, Minister di Hustisia, servisio di seguridat, VDSM, hefe di Kuerpo Polisial i presidente di parlamento. Algun dia despues a amplia e reunion ku miembronan di parlamento.

Meta tabata pa sòru ku tin seguridat pa pais. Pa logra den esaki a disidí di buska 25 polis èkstra di Kòrsou, Aruba, Saba i St. Eustatius. Tambe a haña asistensia di e tim di aresto di Kòrsou i alabes RST ta manda 23 personal èkstra pa yuda den e trabounan pa garantisá seguridat. NOTA: Texto ta scirbi den Papiamento fonetico di Corsou. 

Riba dia di elekshon mes, esta 19 di ougùstùs e kuerpo boluntario di St. Maarten, VKS lo yuda den mantenshon di órden públiko i gobièrnu di St. Maarten ta negoshando ku Marechaussee pa duna asistensia durante e periodo promé i despues di elekshon. Finalmente Mercelina ta bisa ku a pidi alabes asistensia militar for di Hulanda.

“No ta tolerá ku via violensia ta influensiá prosesonan demokrátiko di St. Maarten. Komunidat no a kustumbrá ku e situashonnan aki i mi lo tuma tur medida nesesario pa komunidat di St. Maarten por bai bèk na e bida ku nan a kustumbrá kuné.”