CAft: Gobierno mester baha e necesidad di financiamento pa 2025

ORANJESTAD – Den su conseho riba e presupuesto 2025 di Aruba, e colegio di supervision financiero CAft ta conseha gobierno (atrobe) pa haci modificacion. E biaha aki ta trata di 5 modificacion na e concepto di e presupuesto, prome cu ofrece esaki na Parlamento.

E MODIFICACION

CAft kier pa gobierno baha e necesidad di financiamento pa 2025 empleando e surplus di henter e sector colectivo. Den e marco aki ta importante pa traha acuerdonan cu AZV y SVb mas pronto posibel, tocante di e manera cu pais por emplea e surplusnan cerca e entidadnan aki pa reduccion di debe. Ademas, kier pa den e prespuesto, presenta e desaroyo multianual di henter e sector colectivo te cu 2040. Tambe nan kier pa presenta e desaroyo multianual di e gastonan di personal conforme e definicion di e LAft. Ademas, CAft kier pa modifica e presupuesto basa riba e informacion di implementacion mas actual di e pais, y e estimacion multianual actual di SVb. Banda di esey, determina e sector colectivo pa 2025, obligando e entidadnan cu ta pertenece na esey pa adopta oportunamente nan presupuestonan.Y finalmente, CAft kier pa gobierno yega na un agenda di inversion multianual, traha riba mehoracion di capacidad riba e area aki, y controla structuralmente e gastonan mediante un marco di gastonan pa garantisa cu riba termino medio-largo efectivamente ta utilisa e espacio presupuestario pa inversionnan. Pa lesa e conseho completo di CAft, click AKI.