Director di Servicio Secreto a renuncia despues di intento di asesinato riba Trump

WASHINGTON - Directora di Servicio Secreto di Merca, Kimberly Cheatle, a renuncia despues di e atake riba ex Presidente Trump. El’a anuncia esaki den un email na su empleadonan.

E Servicio Secreto ta proteha presidentenan y ex  presidentenan. E servicio a wordo hopi critica pasobra e pistolero cu a tira Trump na Pennsylvania a wordo notasolamente hopi laat pa e guardianan di seguridad.

TIRONAN FOR DI DAK

E homber arma a subi riba un dak di un edificio na rand di e tereno unda Trump tabata tene un accion di campaña. For di e momento ey el a logra los varios tiro den direccion di e ex mandatario, kende a keda herida na orea. Un persona cu tabata para einan a muri. Despues di e atake, e homber a wordo mata pa francotiradornan.

E director a wordo scucha den Camara di Representantenan ayera y a declara cu e servicio a fracasa dia 13 di juli. Na cuminsamento di e audiencia riba e atake, el a tuma responsabilidad completo pa e curso di e susesonan. Anteriormente el a pidi despensa na Trump via telefon.