Wever: Schwengle buscando scapegoat pa fayo operatiekamer

ORANJESTAD - Minister di salud Alex Schwengle ta buscando un ‘scapegoat’ pa e fayonan cometi rond di e operatie kamer nobo. Asina e lider di partido UPP Booshi Wever ta bisa den su ultimo comunicado. Segun Wever, un biaha mas Schwengle a demostra cu e no ta un homber para den su sapato. E ex minister di salud ta referi na e articulo reciente di NoticiaCla.com unda cu e mandatario ta toca e problema atrobe di operatie kamer, 4 luna despues cu e reunion riba e topico tabata den parlamento.

REUNION PARLAMENTO

Wever ta recorda cu fin di februari 2015 parlamento a urgi e minister pa laga conduci un investigacion cu lo mester aclarea e situacion di e salanan di operacion na hospital, y e minister a priminti di lo a regresa parlamento cu e conclusion despues di dos siman. “ Cuatro luna a pasa y e minister porfin ta declara na NoticiaCla cu e motibo cu e reunion no a tuma lugar ainda, ta pasobra e no a haya tur e informacion cu e tabata pidi, ya cu hospital no tabata duna contesta riba preguntanan haci” Wever ta bisa. E ex minister di salud ta bisa cu Schwengle, den su afan pa busca un "scapegoat", ta menciona den dicho articulo cu e sa kende ta e "culpabel nan", y ta haci cierto insinuacionnan, pero ta demostra atrobe falta di hombresa, y no ta menciona e nombernan di e supuesto "culpabel nan".

ARTICULO ANTERIOR

Wever ta referi despues den un articulo anterior unda cu a cuestiona e forma cu e minister actual lo kier a conduci e investigacion. A laga un instancia independiente conduci e investigacion aki, y a acerca tur esnan involucra den e proyecto di renobacion di hospital, of a simplemente laga un compinchi busca informacion cu lo por a confirma e sospecho cu e minister kier trece den publicidad??? “Pasobra naturalmente, manera ya nos a trece padilanti, Alex S. tin cu tira culpa riba otro pa tapa su propio fayonan y pa scapa su peyeho. E actonan aki den nos concepto, un actitud asina no ta "pas" pa un gobernante serio” Wever ta sigui bisa. E ta considera cu ta un secreto publico cu e minister aki ta tira culpa riba tur hende, y te hasta ta intimida tur hende cu e unico meta di purba di tapa su propio fracaso y incapacidad di maneha e carteranan cu ta cay bou di su responsabilidad.

TIRA CULPA

“E biaha aki ta parce cu e minister kier tira culpa riba e Raad van Bestuur anterior. Y ta menciona cu un di nan ta sinta den e Raad van Bestuur ainda”. Esaki ta nifica cu ta sea sr. Boesten of ta dr. Jaime Falconi e kiermeen, pasobra e unico miembro di e Raad van Bestuur cu ainda t'ey ta e director financiero actual sr. de Kool. Aki un biaha mas ta mustra su falta di hombresa di no menciona nomber. Con cobarde mas bo por ta?, Wever ta sigui bisa.