MEP y AVP den tangana riba votamento pa noodwet diaranson anochi

ORANJESTAD – E hecho cu partido MEP a nenga di vota pro pa e ‘noodwet financien’ diaranson anochi den Parlamento a crea un ola di protesta di partido AVP. “Mi ta babuca. Mi ta babuca” lider di fraccion di AVP Rene Herde a bisa. Su argumento ta cu e no ta compronde e motibo real di votamento di partido MEP, y ta cuestiona como tal, nan presencia diaranson anochi. “Mi echt no ta compronde” e la sigui bisa. Otro parlamentarionan di e partido berde tambe a cuestiona e votamento di MEP, y a mustra cu partido MEP no merece e voto di e pueblo mas. Parlamentario Melvin Tromp a indica cu segun e, MEP ta votando contra algo cu nan mes a origina. “E ta un ley pa paga debe. Debe cu boso mes a sera na 2004” Tromp a bisa. E tres damanan Jansen, Croes y Velazquez tambe a zona nan bos cu asombro, indicando cu ta incomprendibel kico MEP a haci diaranson anochi. “Nos echt no ta compronde” Desiree Croes a laga sa tambe.

Di parti di MEP, (cu tabatin apenas 3 persona den sala), Glenbert Croes a splica cu MEP no a vota pasobra nan ta consistente. “Nos no a vota pa e presupuesto. Como tal dificilmente nos por vota pa esaki tambe” Croes a bisa. :”Nos ta sigui un liña” Croes a sigui bisa. Un rato despues, lider di partido MEP mes Evelyn Wever ( e ta den exterior) splica mas extenso riba e motivacion di MEP pa no vota. “Nos a vota contra pasobra e dictum ta papia di exigi respet pa budgetrecht di Staten y nos ta di acuerdo cu esey pero den e overwegingen ta mustra cu ta Gobernador no ta respeta budgetrecht di staten y esey no ta corecto” Wever a bisa. Segun lider di e partido, ta AVP mes ta viola e budgetrecht di Staten. “E dictum ta exigi tame respet pa nos autonomia cual nos ta para 100% su tras. Pero atrobe e overwegingen ta bisa cu ta Gobernador a viola autonomia siendo cu tur hende sa cu ta Gobierno di AVP mes a invita Hulanda pa mete den nos asuntonan interno. Ta AVP a entrega nos autonomia y no gobernador. “Pesey nos a vota contra e mocion” Wever a laga sa.