Dwight Leoneta ta conta di 'Buleria', un aña despues..

ORANJESTAD – Un aña despues di a keda forma, e agrupacion musical local Buleria, ta un di e bandanan mas popular na Aruba. Cu un conferencia di prensa y un toca gratis na e sitio popular Hamaka Road Cafe, e grupo di 13 hoben, a mustra den fin di siman cu nan tey pa keda. Y si ta pa e motor y creador di e banda Dwight Leoneta a splica NoticiaCla.com, nan tey pa hopi. For di un idea cu a nace 3 aña pasa, awe Buleria ta un banda cu a cruza frontera y tin como meta pa sigui hiba Aruba su nomber den exterior.

E IDEA

Un idea di Leoneta y amigo di hubentud Jairo Everz na januari 2012 a nace, desaroya y un aña y mei despues a concretisa den loke Buleria ta awe. E nomber originalmente ta tipifica e ritmo flamenco cu ta expresa alegria segun Leoneta. E ta credita conocido personalidad Tai Foo Lee cu a bin cu e nomber. Y awe e nomber ta zona tur caminda, riba tur radio y den tur club y evento.

DWIGHT LEONETA

Leoneta mes, un musico considera di taya y experencia, hunto cu su amigo di hubentud Jairo Evertz, ta de hecho, e base di e banda. Un boneriano di nacemento, y cu a pasa gran parti di su bida na Bonaire tambe riba e isla di flamingo, a desaroya den un musico completo, cu experiencia na tanto Hulanda y finalmente Aruba. Despues di a crea e banda na Hulanda ‘Caché Deluxe’, e la sinti cu e tabata cla pa un reto nobo cu ta Aruba. Aki e idea a nace pa crea loke awe ta Buleria. Hunto cu Evertz, nan a sinta hunto na januari di 2012, pone tur cos riba papel y cuminsa move. Y 16 di juni 2014 tabata asina lew cu nan a lanta e banda.

MEDIO SOCIAL

Usando tecnologia moderno di un forma practico, y mas aun e poder di medio social, Den apenas un siman di nacemento, nan a wordo acerca pa Surnam pa toca eynan. Tur danki na e poder di medio social. “Si bo no ta den medio social, bo no ta conta” Leoneta a sigui bisa. E ta e miho forma pa mercadia bo mes. Y esnan cu a sigui e banda te awor, por ripara cu nan tin un forma agresivo di mercadea tur nan paso via Facebook, propio website y otro formanan social. E combinacion aki, hunto cu un repertorio varia y un disciplina di un ekipo di 13 hoben (semper uniforma, na tempo y respetuoso), a pone cu Buleria a logra domina e mercado den tur sentido di palabra. Y si ta pa Leoneta, aki 5 aña nan ta mes duro, y ‘hibando Aruba su nomber den exterior’.