Gremionan kier claridad riba acuerdo cu Eagle LNG

ORANJESTAD – Reciencemente cuater gremio comercial di Aruba a manda un carta pa minister di Energia Glenbert Croes, pidiendo claridad riba e contracto cu gobierno tin cu Eagle LNG. Manera ta conoci, ta algun aña pasa cu gobierno a firma un acuerdo cu e compania pero despues no a tende nada mas. Luna pasa gobierno a informa cu siguransa cu e proyecto cu Eagle LNG ta continua. Mas informacion no a duna. Mientrastanto tin un documento riba maneho di energia cu e gremionan a haya pa wak. 

NECESIDAD 

Segun e cuater gremionan, e documento “Energiebeleid” di Ministero di Labor, Energia y Integracion, ta confirma cu tin necesidad pa Aruba prepara pa cambio di clima y crecemento di demanda di energia. E mesun documento ta declara cu mester converti nos sistema di produccion na energia cu ta autosuficiente y “klimaatneutraal”, via produccion di energia renobabel. “ Nos ta di acuerdo cu e vision pa un transicion na energia renobabel mas pronto posibel” e gremionan ta bisa.

RETRAZO DEN INVERSION DI PARKE MOLINA

“Mientrastanto,”, e gremionan ta sigui bisa, “nos por observa cu ainda tin retrazo den inversion pa mas parke di molina y parke solar. Cu e carta aki nos ta pidi pa nos ricibi splicacion di y claridad riba e contenido y efecto di e acuerdo entre nos gobierno y Eagle LNG, especialmente con e acuerdo ta afecta Aruba su planes pa crece nos dependencia riba energia renobabel y reduci nos dependencia riba energia cu no ta autosuficiente” e carta ta sigui bisa. No a duna e minister un fecha pa contesta e preocupacion y notacion di e gremionan, sino cu solamente a bisa cu nan ta “aprecia consideracion pa nos peticion, y ta keda en espera di un reunion pa por ricibi mas informacion”. Click AKI pa e carta. NOTA: E potret acompañando e articulo ta uno di archivo, representando e 4 gremionan.