Aumento leve di casonan di Covid na Corsou no ta motibu pa alarma

WILLEMSTAD - Ta mira un oumento leve den kantidat di kasonan di infekshon ku e viro di Covid, pero no ta algu alarmante. Asina epidemiólogo, Iralice Jansen ta konfirmá pa EXTRA despues ku for di siman pasá informashon tabata sirkulá ku tin un momento den kantidat di infekshon atrobe.

Diferente pais a notifiká ku a nota un oumento den kasonan di infekshon ku Covid inkluso vários pais den Karibe. Entre otro Anguilla a saka un atvertensia públiko siman pasá indikando ku na Merka tin oumento di kasonan di Covid i mirando ku hopi merikano ta bishitá e isla pa festividatnan anual na ougùstùs (“August Monday”) pa siudadanonan protehá nan mes mas mihó ku ta posibel.

Jansen ta bisa ku entre tantu algun pais den Karibe a indiká a ku nan kasonan di infekshon ta bahando atrobe. E oumento leve ku a konstatá na Kòrsou, segun e epidemiólogo no ta straño mirando ku Covid nunka a bai i lo keda tambe presente meskos ku e viro di grip tambe ta kontinuamente presente.

E echo ku ta den temporada di fakansi hendenan ta biaha hopi i grupo grandi di hende ta riba otro den por ehèmpel avion i na fiestanan, segun Jansen ta alsa e riesgo riba infekshon. E konseho básiko ta keda tambe pa evitá kontakto di aserka ku hende i tene distansia.

Den kaso ku no logra pa mantené distansia ta konsehá pa bisti un tapa boka. Jansen ta bisa ku pa e motibu aki tambe ta mira aki aya ku hendenan ta kana ku nan tapa boka bistí e dianan aki.

Pero un biaha mas e ta indiká ku no tin un situashon alarmante. “Ta kestion di monitor e situashon.”

Un grupo ku si mester keda alerta semper ta e grupo vulnerabel, Jansen ta sigui bisa. Ta trata di personanan di edat haltu, personanan den kas di kuido i personanan ku kualke kondishon médiko. “Na yanüari tabatin otro buèlta di bakunashon kontra Covid i por a mira ku ta prinsipalmente e hendenan aki a tuma e bakuna.”

Hende grandi

Bou di e grupo di hende grandi tambe ta mira un subida leve di kasonan di infekshon, Jansen ta indiká mas aleu. “Aki ta konta mesun kos, no ta trata di un situashon alarmante i ta kestion di monitor e situashon.”

Hendenan mas hóben ku ta biaha i ta infektá  ku e viro di Covid ta esnan ku potensialmente ta pasa e viro pa hendenan mas grandi. Tin algun kaso di hospitalisashon, pero esaki tampoko no ta hopi.

Jansen ta papia di 1 pa 2 kaso miéntras ku minister di Salubridat, Javier Silvania riba ret sosial ta bisa ku direktor médiko di Curaçao Medical Center (CMC) ta indiká ku ta 3 kaso di hospitalisashon tin. NOTA: Texto ta scirbi den Papiamento fonetico di Corsou