Tur 9 lista y 135 candidato aproba pa eleccion na St. Maarten

PHILIPSBURG - Conseho Supremo Elektoral di St. Maarten a aprobá unánimemente tur 9 lista di kandidato ku ta partisipá den elekshon dia 19 ougùstùs awor. Esaki a tuma lugá durante un seshon públiko ku a tene den sala di reunion di parlamento.

Durante di e seshon kaminda representante di e diferente partidonan polítiko tabata presente, presidente di Konseho Supremo Elektoral, Nathalie Tackling a duna splikashon di tur e fayonan ku a topa den dokumentonan ku a entregá riba dia di entrega di lista i ku partidonan a logra koregí tur e fayonan aki promé ku e “deadline” ku a stipulá pa esaki.

Fayonan ku a konstatá den dokumentonan ku partidonan mester a entregá tabata entre otro fayonan den nòmber di kandidato, fayonan den adrès di kandidatonan i indikashon robes ora a hasi e pago pa por entregá un lista di kandidato kaminda a menshoná nòmber di un persona i no nòmber di e partido.

Riba e 9 listanan di kandidato tin un total di 135 kandidato ku lo partisipá na elekshon pa bin na remarke pa un di e 15 puestonan den parlamento. Party For Progress (PFP) ta partisipá ku 12 kandidato riba lista, Democratic Party (DP) tin 23 kandidato riba su lista, Soualiga Action Movement (SAM) ta partisipá ku 19 kandidato riba lista, Oalichi Movement for Change (OMC) ta partisipá ku 19 kandidato, Nation Opportunity Wealth (NOW) tin 16 kandidato riba lista, United People’s party (UP) tin 18 kandidato, Empire Culture Empowerment (ECE) ta partisipá ku 3 kandidato, Unified Resilience St. Maarten Movement (URSM) tin 15 kandidato riba lista i National Alliance (NA) tin un lista ku 17 kandidato. NOTA: Texto ta scirbi den Papiamento fonetico di Corsou.