- Feliz dia di Himno & Bandera
- Polis na Corsou investigando traficacion di hende despues di naufragio fatal
- A confisca brommer usa pa trece trafico y bida di hende na peliger
- Partidonan dispuesto pa reuni awe riba formacion di gobierno nobo
- Formacion ta tranca awor pa posicion di minister plenipotenciario
Parlamentario independiente kier pa anula e matrimonio homosexual di Hof y Hoge Raad
ORANJESTAD – Parlamentario independiente Rycond Santos do Nascimento, kier pa anula e matrimonio homosexual di Hof y Hoge Raad. Segun e parlamentario, awo mas cu nunca nos mester lucha pa nos norma y balornan tradicional. Nos mester combati e forsanan cu kier destrui matrimonio. E realidad ta cu Corte Supremo (Hoge Raad) a demostra su cara activista cu su decision di dia 12 di juli 2024 ultimo. Mescos cu Hof a demostra di ta activista cu su veredicto di dia 6 di december 2022. Un activista ta un persona cu ta milita pa un cambio den un area politico-social. “Pero, esey no ta tarea di hues. E stoel di hues ta tras di mesa berde, su stoel no ta den parlamento. Tarea di hues no ta pa traha ley, sino pa aplica ley”.
TRABOU DI HOF
Hues ta haci su trabao ora e ta compara e echonan cu loke ley ta bisa segun e Parlamentario. “Tuma e caso di Benny. Hof a scucha Ministerio Publico su acusacion y a scucha Benny su defensa. Despues hues a bay studia tur e evidencianan y a compara e evidencia cu nos Codigo Penal. Asina hues a yega na su conclusion cu Benny a comete varios acto cu nos Codigo Penal ta prohibi, manera soborno, abuso di funcion y malversacion”.
HUEZ A BAY MUCHO LEU
Den caso di matrimonio homosexual segun e parlamentario, hues a bay mucho mas leu cu simplemente aplica ley. Hof a cuminsa bon, pasobra el a cuminsa na compara e definicion di matrimonio den nos Codigo Civil cu e prohibicion di discriminacion den nos Constitucion. “Hof mester a sigui na enfoca riba e beneficionan legal cu parehanan di sexo opuesto tin, manera e echo cu ley ta regla nan herencia pa despues check si parehanan di mesun sexo ta haya e mesun beneficionan. Pero, no ta esey Hof a bay haci. Hof a cuminsa compara e balor sagrado, simbolico y emocional cu matrimonio tin cu e geregistreerd partnerschap. E balor simbolico ey no tin nada di haber cu ley, pasobra e balor simbolico ta producto di nos cultura y religion”.
SAGRADO
Segun e parlamentario, ley no por crea ni e sentido ni e sentimento cu algo ta sagrado. “ Ningun hende ta sinti cu matrimonio ta sagrado pasobra matrimonio ta skirbi den ley. E sentimento profundo cu matrimonio ta algo importante ta resultado di nos cultura. E cultura ey ta surgi for di nos combersacionnan cu nos mayornan, maestronan y pastornan. E cultura ta surgi for di storianan cu nan a conta nos, manera esun di Adam cu Eva y e storia di e nacemento di niño Hesus. Di chikito nos a siña cu matrimonio ta un sacramento y nos a mira hende casa pa misa. Ta e custumbernan religioso den nos sociedad ta duna e balor sagrado na matrimonio. Hues no tin arte ni parte den crea of cambia cultura. Mucho menos e tin algo di haci si algo tin un balor simbolico of no”.
INHUSTICIA GRANDI
Loke Hoge Raad a haci segun e parlamentario, ta un inhusticia grandi, pasobra el a permiti Hof bulldozer un definicion nobo di matrimonio sin importa kico e pueblo di Aruba, Curaçao y Sint Maarten ta pensa y sinti. “Nan a traha un ley cu parlamento di Aruba a caba di rechasa dos biaha consecutivo. Loke Hoge Raad a haci tambe ta un blasfemia, pasobra nan ta kere cu nan tin e sabiduria y e poder pa cambia e balor sagrado y simbolico di matrimonio pa haci’e mas “inclusivo”. E unico cos cu nan ta logra ta destrui un instituto cu a tuma hopi tempo ta forma den mente y curazon di un pueblo.
CORTE ACTIVISTA
Ta importante pa subraya cu no ta tur Corte ta activista. E parlamentario ta corda cu e hues den prome instancia a trata e caso di matrimonio cu respet pa nos cultura. Tambe e Corte Europeo pa derecho Humano ta respeta diversidad cultural di diferente pais. P’esey Corte Europeo sigur lo trata cualkier cuestion di discriminacion di hende homosexual. “Pero na ningun momento Corte Europeo ta impone matrimonio homosexual riba ningun pais. Ta e parlamentonan di e paisnan so por contesta e pregunta si mester habri matrimonio pa parehanan di mesun sexo. E motibo ta obvio. Mester respeta e creensianan social y cultural cu ta profundamente hancra den e diferente pueblonan (EHRM 24 juni 2010, 30141/04, EHRC 2010/92, rov. 60-62)”.
ANULA SENTENCIA
Y ta pesey segun e parlamentario, nos mester anula e matrimonio homosexual di Hof y Hoge Raad. “Nos mester lucha contra e movimento aki cu kier destrui nos autonomia cultural. Nos mester hancra un referendum den Constitucion. Nos mester hancra matrimonio entre un homber y un muhe den nos constitucion. Pa salvaguardia nos pais, nos mester combati politico manera Miguel, Marisol y Gerlien. Enfin, nos mester vota pa politico cu tin e curashi y cu ta dispuesto pa para firme contra tur tipo di corupcion di nos norma y balornan tradicional”.
Partidonan dispuesto pa reuni awe riba formacion di gobierno nobo
ORANJESTAD – Por ta cu ya awe dialuna, comunidad ta conoce e nomber di e ministernan nobo di e gabinete nobo cu mester sinta proximamente. No tin nada oficial programa, pero tur partidonan ta habri y dispuesto pa reuni cu otro, aunke cu e oficina di gobernador mes oficialmente ta cera pa dianan di fiesta. Si ta bon, formadornan Mike Eman y Gerlien Croes mester a papia cu e candidatonan pa minister e fin di siman aki, y ricibi e ultimo resultado di screening di e candidatonan diabierna ultimo. Manera cu Noticiacla a bisa diabierna caba, e biaha aki no tin un fecha specifico stipula pa e siguiente encuentro entre formadornan y gobernador di Aruba, SE Alfonso Boekhoudt.
Formacion ta tranca awor pa posicion di minister plenipotenciario
ORANJESTAD – E motibo di problema pa forma un gobierno nobo, ta keda escohencia di persona pa yena funcion. Manera a bira e chiste den pueblo, ta mucho ocupa bringando cua popchi ta haya cua posicion. Si e intencion y boluntad tabatey pa awe dialuna keda cla cu e formacion y acudi na gobernador pa por los e lista di nomber di candidatonan pa minister, esaki tin cu warda algun dia mas. Por lo menos te diaranson of mas sigur diahuebs. Discusion ken ta bira e proximo minister plenipotenciario, ta awor e dolor cabez di e formadornan. Algo cu segun informacion, tabata conoci hopi tempo pero cu awor a bira un asunto primordial.
Asina cu formadornan ta cla, nan por bishita gobernador!
ORANJESTAD – E biaha aki no tin un fecha specifico stipula pa e siguiente encuentro entre formadornan y gobernador di Aruba, SE Alfonso Boekhoudt ta spera di por reuni cu e formadornan Mike Eman y Gerlien Croes ya na comienso di otro siman pa consulta e acuerdo di gobernacion final y e alocacion di carteranan. Esaki ta e mensahe cu e formadornan a haya diahuebs. E pregunta ta kico esaki kier men realmente, mirando cu tin dianan liber otro siman tambe.
Delegacion di Conseho Insular di Boneiro ta na Aruba pa bishita di trabou
KRALENDIJK/ORANJESTAD – Entrante awe 13 pa 19 di maart 2025 conseheronan James Kroon, Daniel Crestian, Cyrill Vrolijk i Benito Dirksz lo bishita Aruba den nomber di Conseho Insular di Boneiru pa un bishita di trabou. E meta ta pa explora proyectonan y fortalece e entrada di politica den varios area.
Formadornan: Screening no ta cla y no por divulga nomber di ministernan ainda!
ORANJESTAD – E screening di candidatonan ministerial no ta cla ainda y como tal no por a informa di nomber di candidatonan pa minister. Asina e co-formador Gerlien Croes a informa na salida for di e audiencia cu gobernador SE Alfonso Boekhoudt diahuebs mainta. Notable ta cu ambos formador a yega gobernador laat, pasa di 10'or mientras cu e cita mester a cuminsa 10'or. A entrega e concepto di programa di gobernacion y otro informacion, pero nada ainda di nomber di minister. Segun e formador, falta ‘mas cu un instancia’ cu no ta cla ainda cu e screening. Noticiacla mientrastanto a compronde cu falta dos instancia ainda cu tin cu raporta bek cu nan respectivo relato riba e lista di ministernan en cuestion. Eman mientrastanto a specula cu pa e siman aki ainda cos por keda cla, pa asinapor tin un clausura di e screening pa por informa publicamente ken e candidatonan ta. Mayoria di e resultado di screening a drenta caba segun co-formador Mike Eman, y ta premira cu e fin di e siman aki nan por cuminsa papia cu e candidatonan di minister, pa por finalisa e proceso.
Eman: Falta basta pa loke ta screening di candidato pa minister
ORANJESTAD - Falta basta di screening ainda prome cu por keda cla. Asina coformador Mike Eman a bisa na salida dialuna atardi di su reunion di consulta cu gremio, na prensa cu tabata ward’e pafo. Esey ta nifica cu pa diahuebs awor ora cu formadornan reuni cu gobernadora pa 10’or di mainta, tin chens cu no tin claridad ainda ken tur ta keda postula pa bira minister ya cu no tur trabou di screening ta completa. Den cuadro di esaki, Eman tabatin dificultad pa indica un posibel fecha pa huramentacion di e gabinete nobo. Echo ta cu no ta formador ta stipula e fecha di huramentacion sino gobernador di Aruba. Y Eman dado momento conciente di esaki, a mustra tambe cu mester duna espacio y respet na gobernador pa cu esaki. Riba e sugerencia di e fecha di 18 di maart, como algo simbolico, esta dia di Himno & Bandera, tampoco no ta un posibilidad realistico. Pa ley, esaki ta un dia liber, y ademas tin acto protocolario agenda pa e mainta ey. Pues tur ta idea bunita pero no realisabel ni ‘logico’.
Follow NoticiaCla
