Corsou ta empata cu Cuba 1-1 y clasifica!

HAVANA – Cu un empate di 1-1, tabata suficiente pa e ekipo di Corsou (di entrenador Patrick Kluivert) clasifica pa e siguiente buelta di weganan clasificatorio pa mundial Rusia 2018. E prome wega (na Corsou) tambe e ekipo a hunga pa un empate 0-0. E wega a keda para 2 ora largo ora cu net na ‘halftime’, un mal tempo a paralisa tur cos unda cu te hasta lamper a dal serca di e camerino di Corsou. Despues di apenas 5 minuut di e tempo inicial, Cuba a hinca su prome goal. Despues, den e di 16 minuut, e hungador di Corsou (Merencia) a hinca e goal di empate. Net prome e prome mitad caba, e keeper di Cuba a ricibi un carchi cora. Dos ora despues, e wega a sigui cu un Cuba cu 10 hungador y ambos ekipo hungando den condicionnan sumamente fastioso, ya cu e tereno a converti su mes den un campo di lodo. Dia 25 di juli Corsou ta haya sa ken su proximo contrincante ta. Foto cortesia Dick Drayer.