Bola di candela cu a lusa shelo diasabra, a resulta di ta regreso di satelite

WILLEMSTAD  – Mientras cu na Aruba autoridadnan encarga cu tempo y asuntonan cu ta regarda situacionan aisna, tabata keto keto, Corsou su servicio Meteorologico si a comunica riba e fenomeno cu tanto Aruba, Corsou como Bonaire y experencia diasabra anochi. Djasabra anochi hopi hende tabata testigu di un bola di kandela ku a lusa shelu. E promé impreshon  ku hopi hende a haña ku ta trata di un meteor ku a drenta atmósfera i despues kaba na nada. Esaki den kareda di algu pa 8 or ayera anochi. Noticiacla mes como no a haya informacion oficial a papia riba e tema cu posibilidadnan cu e por tabata sea un meteorite of un asteroide. Corsou a aclarea e cos, mientras cu Aruba ainda ta keto riba esaki. 

Den un nota, Servisio Meteorológiko Kòrsou a duna di konosé relashoná ku un fenómeno den shelu, kaminda ku hopi hende a mira un bala di lus ku a sòru pa un klaridat inmenso den shelu pa despues kaba na nada, ta relashoná ku partinan di satélitenan ku a bin abou despues di un lansamentu ku a faya.

Esaki ta loke ku meteo a konstatá despues di un investigashon ku nan a hasi.

T’asina ku dia 11 di yüli último SpaceX a lansa e rakèt Falcon 9 ku a hiba no ménos ku 20 satélite den órbita. E lansamentu a tuma lugá for di ‘Vanenberg Space Base California’.

E rakèt, “Falcon 9” a sufri un desperfekto kual a pone ku e no a logra hiba e satélitenan na e órbita ku nan mester a yega pa por keda den espasio. Komo konsekuensia, e forsa di gravedat di mundu ta trèk e satélitenan i  gradualmente nan lo sirkulá rònt di mundu  i drenta atmósfera bèk, kima i kaba na nada.

Manera menshoná e insidente a tuma lugá durante e lansamentu di e Satélitenan di

Internet Starlink di SpaceX. Tur kos tabata bayendo segun plan ku Falcon 9 na prinsipio. E di dos etapa a separá na tempu i e promé etapa a baha pa aterisá riba un barku sin tripulashon mas o ménos ocho minüt despues di a keda lansá, esta manera a plania.

Pero e etapa superior di e rakèt, ku tabata transportá e 20 nave espasial Starlink na órbita básiko di tera, a konfrontá  problema, kaminda ku tabatin un lèk di oksígeno líkido ku a sòru pa reperkushonnan serio pa e mishon.

Falcon 9 ta un rakèt ku ta re-usabel, esta un parti di e rakèt ta regresá pa despues bolbe keda usá.

Pues e loke ku a mira aki na Kòrsou den shelu ku a sòru pa hopi klaridat ta regreso di e satélitenan di SpaceX. NOTA: Texto ta scirbi den Papiamento fonetico di Corsou.