Confrontacion entre Mike Eman y Grupo di 7 awe mainta

ORANJESTAD – Durante su ‘morning jog’ awe mainta tempran, prome minister Mike Eman a topa cu e Grupo di 7 cu tabata staciona ‘riba su ruta’ na Linear Park na altura di su residencia. E grupo (ekipa cu un pancarta largo) a cuminsa papia cu e mandatario, cu na su turno a dicidi di desvia un poco di su ruta, y acerca e grupo pa un rato. Durante e momento ey e integrantenan a cuminsa un intercambio di palabra, di cual algun tabata menos nechi. Despues di mas of menos 2 minuut di intercambio, e mandatario a continua su caminda pa jog mas riba Linear Park. E video (duracion 7:24 minuut) ta sigui cu comentarionan di e varios integrantenan. Atrobe, algun di nan usando palabranan menos nechi, malo y pa hopi, ofensivo.

REACCION 

Den curso di dia, tanto prome minister Eman como fraccion di AVP y MEP a reacciona riba e confrontacion aki, y a sea condena of duna nan aprobacion. Lider di fraccion di e partido, a manda un comunicado, desaprobando e confrontacion aki.

REACCION PROME MINISTER

Riba su pagina di facebook, prome minister Eman a pone : " “Mi heroe y idolnan politico a muri na man di asesinonan loco y yen di rabia. Pero JFK, MLK y RFK nan soñonan a perdura y nan sacrificio a fortifica nan causa. P’esey MEP y Grupo di shete no mester pensa cu ningun dia lo mi sinti mi mes intimida pa nan. Mi t’ey pa Pueblo y Pais sea cual sea e sacrificio cu mi mester haci canando cu Dios mi dilanti " . Hunto cu e post, e potretnan di e lidernan cu e ta menciona. 

REACCION AVP

“E agresion, insulto, menasa, ofensa y kitamento di paz y seguridad personal door di e asina yama Grupo di 7 awemainta contra di Mike Eman, ta otro ehempel di e trend destructivo di e grupo di hende aki” Herde a bisa. “Nos ta condena den e forma mas fuerte posibel e menasa di e grupo aki contra di cualkier ciudadano di nos pais. Tur hende na Aruba, tambe prome minister Mike Eman, tin e pleno derecho di cana y bay unda cu e kier sin mester wordo agredi, menasa, ofendi door di niun hende, den niun forma”. Segun Herde, loke a sosode no tin nada di haci cu un opinion politico. E ta considera esaki como un acto terorista di hendenan cu ta uza formanan contra di ley y contra di derechonan basico di cada ser humano pa biba den libertad, trankilidad y cu seguridad personal aki na Aruba. “ E acto aki, mescos cu otro actonan di agresion y actonan contra di seguridad di nos pais cu e grupo di 7 ta comete, mester wordo condena door di tur hende, tur partido politico, tur organisacion cu kier pa nos tur biba trankilo, na paz y cu seguridad aki na Aruba.” Esaki ta e prome declaracion di e lider di e fraccion di AVP, Rene Herdé, despues di e tende di e acto di agresion diadomingo mainta door di e grupo di hende cu ta yama nan mes “Grupo di 7”.

REACCION MEP

Partido MEP, pa medio di su lider Evelyn Wever Croes a reacciona den un forma mas cortico, riba su pagina di FACEBOOK. “Awe mainta un grupo di homber y muhernan cu curashi a manifesta conta mal gobernacion! Un accion di ciudadanonan sin expresa color politico” Wever a cuminsa na bisa. Na final, el a felicita e grupo pa nan accion “ Masha pabien pero especialmente masha danki na e homber y muhernan balente aki!” Wever a finalisa bisando.               NOTA: Despues di evaluacion, NoticiaCla.com a opta pa mustra e video tambe, y laga tur hende dicidi pa nan mes riba e acto aki. Pero, mes momento NoticiaCla.com ta ADVERTI cu den e video ta usando palabranan malo, cu pa hopi ta considera ofensivo. Pues tene cuenta cu esey. Mira e video AKI . E fotonan ta di Facebook.