Funeraria na Spaña acusa di benta ilegal di cadaver na universidadnan

VALENCIA - E doñonan di un funeraria Spaño ta wordo investiga pa Hues di e pais aki pa participa den un supuesto benta ilegal di cadavernan na universidadnan. Dos di e empleadonan di e tienda tabata wordo investiga caba, pero un apelacion di Ministerio Publico ta busca pa amplia e investigacion pa inclui tambe e doñonan. Na e momentonan aki, tin dos caso habri pa e mesun asunto aki: uno relaciona unicamente cu e supuesto iregularidadnan den benta di un cadaver, y otro pa un supuesto red criminal riba e mesun asunto aki.

CORTE

E decision di Corte Provincial di Valencia, conoci diamars awor, ta relaciona cu e prome di e causanan, specificamente cu e benta di e curpa di un homber cu a fayece den hospital di La Fe na un universidad. Hues investigador ta considera cu un posibel delito di falsificacion di documentonan den Registro Civil a wordo cometi solamente door di e empleadonan di e funeraria. Sinembargo, e fiscal no ta di acuerdo y ta kere cu e “envolvimento, conosemento y capacidad di tuma descion” di e doñonan di e funeraria ta innegabel.

DETENCION

E dos empleadonan y e dos doñonan, di edad entre 41 y 74 aña, a wordo deteni na januari ultimo y provisionalmente a wordo poni den libertad despues di a declara. Polis ta sospecha cu nan a factura 5.040 euro (mas o menos 5.500 dollar of 21.906.840 peso Colombiano) na un universidad pa 11 cremacion di curpa, un biaha studia, cu no tabata refleha den e facturanan emiti pa ningun di e incineradornan cu ta opera den e ciudad.

Aparentemente, esnan investiga a probecha di e diseccion y desmembramento di e curpanan pa pone nan den e caha di morto di otro personanan fayecido, realisando e cremacion di varios cadaver den un solo biaha. Pues, probablemente, nan a evita di paga pa nan, pero nan a factura e universidad, y a hasi ganashi notabel for di dje.