Jeon ta presenta awenochi durante Heat Latin Music Awards na Punta Cana

Posted on 07/11/2024 2:28 pm AST | Updated on 07/11/2024 2:29 pm AST

PUNTA CANA - Awenochi 11 di juli lo bira un anochi grandi pa nos artista local Jeon. Esaki ta debi cu e lo ta un di e artistanan invita pa presenta riba e stage principal durante e 'Heat Latin Music Awards' di e canal internacional HTV. Ta trata aki di e di diez edicion di un di e premionan mas importante pa musica Latino Americano. Jeon lo ta hunto cu e artistanan Alex Sensation, Kiko El Crazy y Dj Adoni. Nan lo presenta nan 'summer hit' nobo cu jama Tekila. Algun siman atras a graba e video clip na Miami y otro siman e lo keda comparti riba diferente plataforma. Sinembargo diahuebs anochi mundo lo haya e primicia den forma bibo durante e evento aki. Tambe lo presenta riba e mesun stage aki artistanan manera Jey One, La Perversa, Silvestre Dangond, Tito el Bambino, Lomiel, Felipe Pelaez y hopi mas. E canal di television HTV lo ta dunando diferente premio manera productor di aña, mihor cancion viral, mihor artista tropical, mihor artista di salsa, mihor compositor di aña y hopi mas. E premio aki ta conta cu un sintonia grandi y lo keda transmiti via cable tv HTV, youtube y tambe via losheat.tv.

E transmision di e premionan ta cuminsa pa 7'or di anochi ora di Aruba.