Diabierna Aruba ta conoce dos sentencia crucial den Corte

ORANJESTAD – Diabierna Aruba ta conoce dos sentencia importante di cual uno por ta esun mas crucial. Diabierna mainta pa 9’or ora di Aruba, Corte di Casacion ta duna su veredicto den e caso di matrimonio di mesun sexo. E sentencia aki ta uno determinante pasobra esaki ta dicidi e tema pa Aruba, apesar di kico leynan na Aruba ta bisa riba e tema te awor. Mes momento tin e sentencia den Corte di Apelacion den e caso penal Avestruz unda cu un ex minister ta tende si tin cambio den su sentencia anterior. E sentencia aki pa e ex mandatario no ta esun final, a lo menos cu e acepta esaki diabierna.

CORTE CASACION

Pa 9’or di mainta, ora di Aruba Corte di Casacion ta dicta su sentencia riba e caso di matrimonio di mesun sexo. Den e caso aki, e pensamento ta cu -teniendo cuenta cu e conseho di e Abogado General- Corte di Casacion lo mantene e sentencia dicta anteriormente na Aruba, esta cu mester permiti matrimonio di mesun sexo na Aruba. Ta un hecho cu mayoria bes, casi semper te awor, e conseho di e Abogado General riba e tema, ta wordo tuma integralmente. Basa riba esaki, ta premira un resultado ‘conoci’. Asina mes, cos por ta diferente unda cu e sentencia por desvia di e conseho di e Abogado General. E pregunta ta, con e sentencia lo keda presenta, kico exactamente e sentencia lo ta y con Aruba mester aplica e sentencia aki. E sentencia lo keda presenta en vivo cu señal directo for di e sala di Corte di Casacion na Hulanda. 

APELACION PA AVESTRUZ

Den caso di apelacion di e caso penal Avestruz, esaki tambe ta keda presenta diabierna, pa 1’or di merdia ora di Aruba. Mescos cu ta e caso prome di Corte di Casacion, esaki lo sosode via un link di video, mirando cu e sentencia lo keda presenta na Corsou. Aki mester tende si e sentencia pa e 7 sospechosonan ta cambia, sea ta aumenta sentencia, reduci esaki, mantene esaki igual of camvia wsaki pa algo otro. Noticiacla a compronde, papiando cu varios di e sospechosonan, cu algun lo mantene nan mes na e sentencia di diabierna, y no apela, mientras cu algun otro lo bay ‘all the way’, esta te corte di casacion, pa asina restaura nan honor y nomber. Entre nan, por bisa cu ex minister Benny Sevinger ta un di nan cu a bisa cu e ta bay ‘te final’. Pa esnan cu dicidi di apela, esaki ta nifica Corte di Casacion, mientras cu pa esnan cu acepta nan sentencia, esaki por nifica cu algun ta bay prizon, otronan ta paga nan castigo den forma di multa mientras otro por bay cas y cera e capitulo aki pa semper.