ORANJESTAD — Gerencia di ELMAR diaranson mainta a informa cu nan a tuma nota di un publicacion yena cu insinuacionnan falso y intencionnan personal di kisas algun persona pa crea discordia den ELMAR. Segun e compania, locual ta pasando ta cu den ELMAR tin varios investigacion andando, esaki ta un proceso necesario pa identifica fayonan, coregi y mehora e calidad di maneho y rendimento den diferente division di e compania. “ Kisas tin algun persona of personanan cu no ta gusta cu e investigacionnan necesario aki ta tumando lugar y ta opta pa inventa fantasia y lansa insinuacionnan anonimo y sin base. Esey so caba ta kita tur credibilidad di esnan cu ta trata di purba scapa nan mes sushando otro nan bon nomber” e compania a sigui bisa. Gerencia actual di ELMAR a bisa di tin un responsabilidad y tarea sumamente importante pa coregi loke no a bay bon den pasado pa asina sigura e pueblo di Aruba un maneho integro y operacion di suministro di energia confiabel, stabiel pa futuro. P’esey ELMAR ta trahando tambe cu partnernan internacional, pa yuda mehora e calidad di e procesonan di maneho. “Aruba merece un compania di utilidad caminda no ta proceduranan scondi, intimidacion, insinuacionnan anomimo ta dirigi of purba influencia maneho” e compania ta sigui bisa. Gerencia actual di ELMAR ta bisa tambe di ta para pa maneho responsabel, profesional y transparente cual ta garantisa stabilidad y progreso di e compania, p’esey e proceso di investigacion ta bay continua y awor amplia segun ta haya ta necesario. Segun e compania, tur cos ta mustra cu ta un grupito di 10 pa 15 empleado cu lo a planea pa haci e publicacion negativo y eroneo aki. Gerencia di ELMAR mientrastanto a gradici tur empleado cu a expresa nan confiansa den su maneho y tambe na e sindicatonan cu a distancia nan mes di e publicacion.
ORANJESTAD – Un dia despues di a bishita Aruba, e barco crucero Rotterdam di Holland America Line, a raporta un brote di malesa gastrointestinal riba su nabegacion actual cu mas cu 100 pasahero malu abordo. Di acuerdo cu e Centronan pa Control y Prevencion di Malesa (CDC), Rotterdam di Holland America Line tin 107 invitado malo abordo di su biahe actual cu a sali dia 2 di februari 2025. Segun informe, 12 miembro di tripulacion tambe ta malo.
BOGOTA – Un grupo di ciudadano Colombiano a keda deteni pa agentenan di imigracion.Esaki segun e portal pluralidadz.com. Segun e relato, no ta specifica mucho si di ki tempo esaki a sosode ni cu cuanto hende. Solamente cu un grupo di agente di biahe Colombiano a raporta di ta victima di trato inhusto y arbitrario di autoridadnan di inmigracion di Aruba. Loke ta hala atencion, ta cu e accion aki a logra hala atencion di medionan Colombiano, poniendo un tinte negativo riba nos servicio di imigracion.
ORANJESTAD - Diaranson 13 di Februari 2025, Wikipedia riba Aruba lo lansa oficialmente cu un evento di apertura na Biblioteca Nacional Aruba. E proyecto aki, cu ta dura 18 luna, tin como meta pa educa e comunidad local riba e poder di Wikipedia, forma un comunidad activo pa comparti conocemento, y mustra e herencia rico di Aruba riba un plataforma global.