Andre Schouten ta director Tele Aruba entrante 1 di juli

ORANJESTAD – Entrante 1 di juli Tele Aruba tin un director nobo. NoticiaCla.com a confirma cu Andre Schouten a acepta e reto pa bira e proximo director di nos planta nacional, entrante e fecha menciona. Hopi detayes ainda no ta conoci, pero fuentenan serca di dje, a confirma diasabra merdia cu enberdad Schouten, despues cu a ofrece e funcion, a dicidi finalmente di acepta e reto y bira e hefe maximo di e canal.

TOKO WINKLAAR

Schouten ta reemplasa Victor “Toko” Winklaar cu te cu december ainda di aña pasa, tabata director di e canal pa algun aña. Despues cu a prolonga su contracto na juni di aña pasa, december gobierno a dicidi cu no ta haci esaki mas y a prefera di laga e bay. Mientrastanto Rona Tromp y Giovanny Kock a tuma e rienda di e canal te ora cu a logra haya un director nobo. Pa hopi tempo tabatin rumornan cu e actual director di noticia di e canal, Lelicia Tromp lo a bira e director, pero esaki a keda desmenti despues.

CARERA

Schouten no ta un persona desconoci den mundo di media. Aunke cu e no a traha den television nunca (contrario na su ruman homber grandi Robby cu tin e programa popular “Leu fo’i cas), e la maneha e parti di operacion di Oranjestad Printing y despues Prographics ora cu esaki a uni cu VAD. Despues e la maneha su propio compania y un tempo tabata co-doño di e café “La Terraza”.