Na Corsou, minister ta sigura cu e no a agredi hende na concierto Hak’e

WILLEMSTAD.- Minister Ruisandro Cijntje lo pone otro siman un konferensia di prensa pa konta su banda di medaya. E ta refutá ku el lo a agredí, pusha òf dal hende muhé. E ta bisa ku tampoko e tabata burachi.

E ta papia di di akusashonnan baho i horibel kontra su persona. Esaki apesar ku tin un keho entregá kontra su persona pa un suseso durante di e Hak’e Summer Festival.

Cijntje ta bisa ku den e konferensia di prensa e lo duna un splikashon den sekuensia kronológiko i den tur transparensia kaminda tur hende por saka nan konklushon kiko a sosodé. E minister ta gradisí tur esnan ku ta kere den su inosensia i ta bisa ku hamas e lo defroudá nan.

“Pa esnan ku ke mata i asesiná mi imágen mi ta pidi Dios iluminá bosnan mente i mi ta pidi bendishon pa bosnan. Pasobra lokual ku ta skibi i konklushonnan ku ta saka, mi ta lamentá ku mi no a haña e oportunidat pa mi por a konta e parti di mi vershon promé ku e señora a splika di su banda.”

Ku e señora, Cijntje ta referí na e persona ku a entregá keho kontra su persona pa agreshon (físiko). “Pero no ta nada pasobra loke mi ta sumamente kontentu kuné ta ku a duna keho ofisial”, e minister ta enfatisá.

E ta splika ku e keho ofisial aki ta duna oportunidat pa investigashon saka afó ku e ta inosente. E minister lo tene su konferensia di prensa asina ku e regresá for di eksterior mirando ku e ta huntu ku minister Charles Cooper na Miami pa apertura di e konferensia anual di “Caribbean Association of National TeleCommunications Organization” (CANTO).

Asta e diskushonnan ku a nenga su persona huntu ku su señora esposa i un amiga nenga pa drenta no ta kuadra ku bèrdat, segun Cijntje ta bisa. “Nan no a stòp mi niun momento so. Hopi kos a sosodé i a tira hopi kos den mi direkshon kaminda esakinan no ta kuadra.”

Mas aleu e ta bisa ku ta hopi straño ku un hende ta duna keho kaminda loke a duna keho pe no a sosodé, “esta mi no a mishi kuné i tòg a duna keho. Ami ta kere ku mala fe nunka por paga di buena fe.”

Finalmente e minister a yama danki pa e bendishonnan i tur esnan ku ta hasi orashon pe. “E no ta fásil, pero mi ta siñando ku den e arena polítiko ku mi ta, ku tin hende ku no ke mira progreso, pero mi ta asumí tur e responsabilidat i lo mi sigui sirbi komunidat ku tur mi kurason.”