Segun minister, Arubus ta bancarota: Director manda cas per direct!

ORANJESTAD – Dialuna atardi, minister encarga cu transporte Ursell Arends a anuncia cu Arubus ta bancarota, y cu a manda e director actual Edwin Mohamed cas ‘per direct’. Segun e mandatario, efectivo inmediato, Sr. Edwin Mohamed lo separa su cargo como Director di Arubus N.V. Aruba. 

“Desafortunadamente mester remarca cu ta pa politica Arubus ta para unda cu e ta awe. Un compania cu ta bancarota segun, no solamente Gobierno di Aruba, pero Algemene Rekenkamer, CAft y Price Waterhouse Cooper” Arends ta sigui bisa. 

“ Pa es motibo mester tuma e decision clave na e momento crucial aki di restructura e compania pa asina pon’e ariba caminda di recuperacion real”. Raad van commissarissen a ricibi un carta di Gobierno di Aruba pidiendo un reorganisacion completo cu e participacion di e trahadonan. 

E ta bisa cu su ministerio ta extende su mas profundo aprecio na Sr. Edwin Mohamed pa su añanan di servicio y su contribucion na Arubus N.V. Aruba. “E reorganisacion aki ta esencial pa futuro di Arubus N.V. Aruba, y Gobierno di Aruba lo sigui mantene e comunidad informa di cualkier desaroyo adicional”.

KEN TA REEMPLAZA MOHAMED

E minister no a bisa ken ta reemplaza Mohamed, aunke cu e portal 24ora.com ta bisa cu ta e ex director di Insel Air y ex presidente di Algemene Rekenkamer di Aruba, Frederick Nuboer. Yamada na sr Nuboer no a duna resultado ainda.