Aruba ainda sin candidato pa College Aruba Financieel Toezicht

ORANJESTAD – Aruba no por a presenta su candidato awe pa College Aruba Financieel Toezicht (CAFT) durante e conseho di minister di Reino na Hulanda awe. Como tal nan a bisa Hulanda cu den e proximo RMR (Rijkministerraad) nan lo presenta e nomber di e candidato. Informacion cu nan lo tin problema pa haya candidato, a wordo desmenti categoricamente diabierna atardi. ‘Berdad cu ta buscando, pero e hecho cu e circulo ta chikito, ta haci’e dificil pa haya un persona cu e perfil necesario’ un fuente cerca di e proceso a sigura NoticiaCla.com. Mes momento a wordo sigura cu gobierno tin confiansa cu pa e proximo conseho di minister di reino, nan lo tin un nomber.

CANDIDATO HULANDA

Hulanda mientrastanto si a anuncia nan candidato, den persona di sra S. Dekker, mientras Age Bakker (actual presidente di College Financieel Toezicht na Corsou) lo presidi e comision na nomber di Reino Hulands. Nan ta eherce nan funcion banda di esun cu nan tin aworaki caba.

PRESTAMO

Den e mesun reunion, conseho di minister di Reino a bay di acuerdo cu Aruba por haya un prestamo pafo di Reino Hulandes (articulo 29 di statuut). Aruba a haci un peticion na conseho di minister di Reino dia 21 di mei ultimo pa e permiso aki 21 di mei ultimo. Cu esaki Aruba por cubri e necesidad financiero pa 2015. E montante cu Aruba a indica di kier fia pafo di Reino, ta maximo 134 miyon dollar (81.5% di suma total di 165 miyon dollar cu nan mester na fianza). E resto nan a haya fia caba   (31 miyon) dia 28 di mei ultimo.

PALABRACION

E hecho cu Hulanda a acorda y aproba esaki, e ta cumpli cu su palabracion di 2 di mei unda cu a acorda cu Hulanda lo asisti Aruba, conforme e palabracion cu lo cumpli cu consehonan di CFT pa cu su situacion financiero. Y Hulanda ta recorda Aruba tambe cu den e decision pa aproba e suma di fiansa, a inclui e conseho di CFT di 4 di juni ultimo referente e presupuesto 2015, e raportahe di prome cuartal, e rapport di progreso y e peticion pa e prestamo. Plasterk ta finalisa, bisando cu e ta wardando e contesta di Aruba riba su banda di e cumplimento ainda. Lesa e carta di Plasterk di awe riba e tema aki. E foto ta di archivo di e ultimo bishita di minister Plasterk, unda cu e la reuni cu premier Eman na varios ocasion. Esaki ta durante un momento di combersacion riba waf, na ocasion di bishita di e pareha Real.