Arends: Plan tecnico di AWSS ta priminti un solucion pa e problema di RWZI

ORANJESTAD – E plan technico di e compania cu ta bay maneha e planta di RWZI, osea Aruba Waste Water Solutions (AWSS) ta priminti un solucion pa e problema na e planta. Por lo menos asina e minister encarga Ursell Arends a bisa diahuebs. Durante di e conferencia, a duna di conoce e plan tecnico di e trabounan cu lo wordo haci ariba nos RWZI nan. 

MOMENTO HISTORICO

Segun e minister, esaki ta marca un momento historico ariba nos isla pasobra pa decadas e problema di awa preto ariba Aruba a keda sin wordo atendi adecuadamente. E sistemanan di purificacion cu ta funciona ariba nan capacidad ta un menasa directo ariba nos sector turistico, nos medio ambiente y nos economia. Despues cu e ley a pasa pa delega e maneho di e plantanan aki na un entidad priva, a move lihe pa por realisa e prome stapnan di e compania recientemente forma. 

EKIPO CAPACITA 

E minister a sigura tambe cu awe AWSS ta conta cu un ekipo capacita cu ta cla pa ehecuta un di e misionnan nacional mas importante den nos historia. E ta sigura cu su ministerio (Ministerio di Naturalesa), conhuntamente cu Ministerio di Energia y Asuntonan General a haci esfuersonan grandi pa por yega na unda cu nos ta awe, ta desea AWSS hopi exito cu nan tarea.