MOU entre LUMC y Aruba ta permiti expansion pa estudio pa specialisacion medico

DEN HAAG  – Na hospital academico di Leiden LUMC a tuma lugar awe 4 di Juli, firmamento di un Memorandum of Understanding entre LUMC, Pais Aruba y dr. Horacio Oduber Hospital. Pa LUMC a firma presidente di Hunta di Conseho di Administracion prof. dr. Douwe Biesma, pa dr. Horacio Oduber Hospital (HOH) a firma Jacco Vroegop, director di HOH y Minister Plenipotenciario di Aruba mr. Ady Thijsen a firma den nomber di Minister di Salubridad y Turismo Dangui Oduber.  

META MOU

E MOU entre LUMC y Aruba tin como meta pa registra e intencionnan unda tur e partidonan envolvi, coopera pa realisa un expansion di e posibilidadnan pa estudio pa specialisacion medico, como tambe conocemento y intercambio di personal entre professionals di HOH y LUMC. Cu e MOU aki ta purba segun e compromisonan haci crea posibilidad pa Arubianonan cu ta coresponde na e criterianan di seleccion di LUMC por haya un lugar di estudio pa specialisacion banda di e cantidad cu LUMC ya caba tin.

PROCESO

Prome cu e acto di firmamento di e MOU, prof. dr. Peter Paul van Benthem, hefe di KNO na LUMC a duna un splicacion con a proceso a yega asina leu. E trayecto a cuminsa tres aña pasa na momento cu un dokter hoben di Aruba a duna di conoce cu e ta desea pa sigi su specialisacion como dokter di KNO y despues regresa Aruba. A dicidi pa mira unda por traha hunto pa asina dokternan Arubianonan por specialisa nan mes y bai bek Aruba y asina yuda den e falta di capacidad di specialistanan na Aruba. Prof. Van Benthem a bisa cu nan a haya hopi sosten di e Hunta di Conseho di Administracion den esaki. E potret ta cortesia di Arubahuis