Ta spera Horcan Beryl diabierna na Mexico despues di a causa desaster na Jamaica

KINGSTON  /MIAMI - Horcan Beryl lo subi tera na Mexico diabierna anochi laat, e Centro Nacional di Horcan di Merca (NHC) ta anticipa. E potente horcan di categoria 4 ta rabia den Caribe cu un velocidad maximo di 215 kilometer pa ora. Diaranson, Beryl a dal Jamaica cu biento y awacero pisa, matando por lo menos un persona. Un dama a fayece despues cu un mata a cay riba su cas. E cantidad di morto a consecuencia di e horcan a subi na por lo menos diez. E cantidad ey probablemente ta mas halto, pero ainda tin poco comunicacion posibel cu islanan rond di dje afecta pa inundacion y biento fuerte.

REFUGIONAN

Casi mil jamaiquino a keda den refugionan te cu diaranson anochi, Richard Thompson, director general interino di e agencia di calamidad di Jamaica, a bisa un emisora ​​di noticia local. E aeropuertonan principal di e isla ta cera y e cayanan pa gran parti ta bashi. Prome minister Andrew Holness a impone un toque de queda nacional diarason manera cu Noticiacla a raporta caba. Algun caminda ta wordo blokia door di mata cu a cay of inundacion.

Segun e servicio meteorologico di e isla, Beryl tabata “a punto di move for di Jamaica” pa islanan Cayman diaranson anochi.