Gobierno nobo Hulandes cu boet pa studiante cu dura largo riba un estudio na Hulanda

ORANJESTAD / WILLEMSTAD - Studiantenan ku dura largu riba un estudio ta kore rísiko di un but. Ta papia di un but di 3 mil euro. Esaki ta e situashon aktualmente na Hulanda den e akuerdo di gobernashon i ku ke laga konta den e aña eskolar 2026-2027.

Hulanda tin su gobièrnu nobo i ku esei tambe den tapara un but (Langstudeer boete) pa studia riba tempu largu pa studiantenan di Kòrsou. EXTRA a papia ku Jean Marie Schmidt ku ta Hoofddocent na Hogeschool Rotterdam i el a kalifiká e medida aki komo unu hopi malu.

Sra Schmidt ta haña esaki ta un komienso malu pa e gobièrnu nobo di Hulanda aki. E ta kere ku e studiantenan ku lo bira e víktima di esaki ta algu di lamentá.

E impakto di e medida aki ta ku e studiantenan di nos isla ta esnan ku mas e lo afektá. E studiantenan ta bai Hulanda kaba ku yen sistema ku ta funshoná kontra di nan mes. Nan ta bai Hulanda ku hopi desafio i awor ta bin e asuntu di but tambe aserka.

Tambe ta un echo ku studiantenan di Karibe hopi bia ta kai afó di enseñansa na Hulanda i hopi bia no ta terminá nan estudio òf ta dura mas largu ku e estudio ei i esei ta trese kuné segun dosente Schmidt ku nan lo bai tin di aber kue  but pa e asuntu di studiamentu largu aki.

E studiantenan ku ta bin di Kòrsou ta bini sigur leu for di nan kas, nan ta haña nan ku hopi problema sosial i e problema nan na Hulanda i awor esaki tambe aserka no ta indiká nada bon.

E problema segun e dosente ta ku Hulanda tin un sistema di enseñansa ku tin algun mankamentu i ku mester keda mantené i esei nan no a hasi.

Ta un solushon pa e problema ku no ta eksistí. Ta un problema mas grandi ku tin awor aki. E ta mir’é komo un di e kosnan mas malu ku por hasi den enseñansa.

E problema ta ku e sistema di edukashon na Hulanda tin ya un falta den dje masha tempu i no a  tuma tempu pa analisá korekto, no a tuma tempu pa buska solushon riba vishon i a pone hendenan na lugá ku no tin konosementu di kiko nan ta hasiendo. I e struktura finalmente ta perhudiká tur studiante.

Nan no a wak e kousanan real di e retraso ku ta surgi serka e studiantenan den nan estudio, hopi bia ta bisa ku e ta sinta serka e studiante mes i no ta wak loke ta robes den e sistema. Por ehèmpel e studiante no ta siña djis pa siña i no ta siñ’é kon e tin di kana den e proseso di enseñansa i ta laga e studiante independiente riba su mes un banda pasobra pa e hulandes, e studiante mester ta independiente.

“Nos ta pidi nos muchanan pa nan ta independiente pero no ta siña nan kon pa ta independiente”, segun dosente Schmidt den e entrevista na Hulanda. I esaki ta trese komo konsekuensia ku e studiante finalmente no sa kiko e tin di hasi.

Sra Schmidt a bisa mas aleu ku Hulanda tin sufisiente medio manera siña nos muchanan pa nan por reflekshoná riba nan forma di pensa, ta siña nan kon nan mester siña loke na su turno ta un paso grandi pa e hóben ta eksitoso mañan. Esaki el a bisa ku mester kuminsá for di chikí, for di skolnan di fundeshi. E ta un sistema ku masha simpel por siña e muchanan. Konsekuentemente tin e medionan nesesario pero mester di e hendenan ku ta tende i  ta hasi lo korekto.

Ta papia aki di 3 mil euro but. Esaki ta trese kuné loke por mira kaba segun dosente Schmidt ku ménos studiante ta tuma parti na enseñansa na nivel avansá i di enseñansa avansá keda bira asina karu, lo haña ménos i ménos hende ta partisipá na dje. Esaki por mira kaba ku studiantenan na Hulanda mes i si e situashon sigui asina aki e studiante for di Karibe hulandes lo no bai Hulanda mas pa studia. I te na ora nan bai mes e lo nifiká ku e situashon ta bira mas i mas karu pa nan.

Esaki no ta hustu pasobra no ta tur studiante ku ta dura largu riba un estudio ta pasobra e tin di aber ku e estudio mes. Ta kastigá e studiantenan pa e fout di e sistema.

Sra Schmidt ta kere ku e bin ku e but aki pasobra na Hulanda hopi bia nan ta pensa ora e problema presentá. Hopi bia ke aktua despues di hopi papia, pa hopi tempu no ta hasi nada ku e vishon korekto i na ora e situashon sali for di man, e ora ei ke hasi algu i di forma ‘adhoc’. I ora aktua di forma ‘adhoc’ hopi bia ta tuma e desishonnan robes, segun sra Schmidt. I manera den e kaso aki ta e studiante ta bira e víktima. I ta masha fásil pa mustra riba otro hende enbes di asumí bo mes responsabilidat. NOTA: E texto ta scirbi den Papiamento fonetico di Corsou.