Otro siman diabierna tin sentencia pa apelacion caso penal Avestruz

ORANJESTAD – Otro siman diabierna tin sentencia den e caso di apelacion Avestruz. Riba e fecha ey, (mesun fecha cu tin otro sentencia importante riba ley di matrimonio mesun sexo). E sentencia di e caso penal Avestruz, ta poni pa diabierna otro siman dia 12 di juli, pa 1’or y mei di atardi. Aki e 7 sospechosonan Sevinger, Sussebeek, Arends, Harms, Nuñez, Mansur, y Werleman lo tende si nan sentencia ta cambia na nan fabor of na fabor di Ministerio Publico. Den varios, ta nan mes a apela, y den otro ta Ministerio Publico a apela. Entre algun di nan tin cu den prome instancia a haya vrijspraak, y otronan castigo di prizon. Noticiacla a compronde cu algun ta determina pa bay ‘all the way’ esta te final cu ta corte di casacion si nan no gana e biaha aki, y otronan a bisa cu nan ta keda te aki, pasobra nan no ta dispuesto pa sigui den e odisea aki mas.