NYT: Biden mes tin duda di su candidatura pa presidencia Mericano

NEW YORK – Presidente Mericano Joe Biden a bisa un persona di confiansa cu su proximo presentacionan den publico ta crucial pa dicidi si e ta sigui cu su campaña presidencial pa un re-eleccion. Asina e corant Mericano New York Times ta raporta. Mas media Mericano cu tin un reputacion serio, tambe ta raportando esaki. Cas Blanco mes a desmenti e informacion. 

ENTREVISTANAN PENDIENTE

E presidente tin un entrevista pendiente diabierna cu e presentador George Stephanopoulos di e cadena ABC, y tambe presentacionnan na Pennsylvania y Wisconsin. Despues di su presentacion pober den e debate recien cu contrincante Donald Trump, e ta den problema serio pa loke ta su imagen y su posibilidad pa por gana e proximo eleccion. E imagen cu a keda atras ta di un homber bieu, perdi, bruha y cu no ta capaz di actua den situacionan serio y tenso. Cualidadnan cu un presidente di Merca sigur mester. Despues di su presentacion pober, gritonan ta creciendo pa e retira, ‘pa bienestar’ di Merca.