Castigo contra Donald Trump pa fraude posponi te September envez di otro siman

NEW YORK – Corte di New York ta dicta e castigo contra ex presidente Trump den caso di falsificacion di documento, no otro siman mas sino te September. Esaki tin di haber cu e decision di Corte Supremo e siman aki cu a opina riba e imunidad di Trump den casonan di corte. A dicta cu e por ta imun mientras cu e tabata presidente. E problema ta cu e acto castigabel tabata prome cu e la bira presidente. Asina mes, abogadonan di Trump a pidi pa e imunidad conta pa e periodo prome cu e tabata presidente, locual a keda aproba tambe. E castigo lo wordo duna awor te 18 di September proximo. Un cuerpo di hurado a dicidi fin di mei, cu Trump tabata culpable den e caso en cuestion. Huez mester a dicta un castigo otro siman. Esey awor ta posponi. No ta premira cu Trump lo haya castigo di prizon, pero si un castigo condicional, pa cual e mester raporta periodicamente na un ambtenaar di reclassering, cu por dificulta su campaña presidencial. E eleccion ta na November proximo.