ELMAR ta confirma cu contratista a perde su bida durante trabou rutinario

ORANJESTAD  - Cu gran tristesa, ELMAR a confirma un sucedido tragico cu a tuma lugar awe diamars mainta,   2 di juli 2024, involviendo un di nan contratistanan cu añas di experiencia. Durante trabou di mantencion rutinario pa corta mata riba area publico cu ta stroba nos liñanan di luz di caya, un contratista lamentablemente a fayece.

Den e momentonan aki, e causa di fatalidad no a wordo confirma pa autoridad ainda. ELMAR ta realisando un investigacion, y alabes colaborando cu autoridadnan local pa identifica e circumstancianan rond di e accidente aki.

Regularmente, ELMAR ta contrata companianan pa snoei mata cu ta pone un riesgo inmediato pa nos infrastructura. Esaki ta trabounan necesario pa siguransa y confiabilidad di e grid.

Patrick Thode tabata un contratista balioso, cumpliendo mas cu un decada eherciendo e tipo di trabounan aki pa ELMAR. Nos pensamento ta cu e famia, amigonan, y coleganan di e fayecido durante e tempo dificil aki. Gerencia di ELMAR ta extende nos mas profundo condolencia y forsa na e famia.