Minister contento cu decision ministerio publico riba HardRock

HAVANA – Manera por a spera, minister Otmar Oduber a reacciona contento for di Havana Cuba diahuebs anochi, tumando nota di e decision di ministerio publico pa no persigui ningun hende den caso Hard Rock. Manera NoticiaCla.com a raporta mas prome, ministerio publico a opta pa no duna oido na e denuncia di ciudadano Jan de Ruijter, cu a pidi pa persigui un lista largo di hende liga na e proyecto hotelero menciona.

NINGUN PRUEBA

Segun Oduber den un declaracion cortico for di Havana (e ta atendiendo un biahe diplomatico e siman aki) , de Ruijter ,- cual e ta considera como un satellite di partido MEP-, ta wordo instrui pa hendenan manera lider di e partido Evelyn Wever Croes y Xiomara Maduro pa haci acusacion contra su persona. Entre otro e intento di de Ruijter pa mancha nomber di Oduber. “Mi ta contento cu awe ariba propio actuacion, ministerio publico a mustra e hecho cu nada robez a tuma lugar”. Tur e documentonan pidi pa de Ruijter, a wordo trata cu tur delicadesa, probando cu nada malo no a tuma lugar. E ta considere mas bien un zet politico. E ta spera cu e ta un les, cu e pueblo di Aruba no ta wordo sirbi cu tipo di acusacion sin base cu e fin di daña nomber di hende.

KEHO SIMULTANEO

A recorda cu mes momento cu de Ruijter a entrega e keho contra Oduber, cu e mandatario tambe a entrega keho contra de Ruijter, pa smaad, esta difamacion y e caso aki den e proximo simannan mester haya un reaccion di ministerio publico. “Mi ta convenci cu ministerio publico lo actua corecto”. El a admiti cu ainda e no a haya contesta di ministerio publico, pero ta spera algo pronto di nan, mirando cu e kehonan a wordo entrega practicamente simultaneamente.