Discurso Mike Eman: Atropeyo inaceptabel contra autonomia di nos pais

ORANJESTAD – Un ora mas laat cu programa, premier Mike Eman a tene su discurso nacional diaranson anochi. Manera tabata di spera, gran parti di e discurso tabata dedica na e crisis actual y gobierno su bista di con e ta mira esaki. Como tal, Eman a splica con a yega unda gobierno ta awe y e polemica cu a surgi entre mandatarionan Hulandes y gobierno di Aruba. NoticiaCla ta resumi algun di e puntonan di e discurso. (por lesa e discurso integralmente aki ). “Un polemica cu a bay hopi leu y unda Hulanda kier impone cierto cosnan na Aruba cu ta trece na peliger nos autonomia” Eman a bisa. A haci mencion tambe di kico ta y lo haci pa garantisa solucion pa problemanan actual. Entre nan Eman a menciona fondonan di seguro social manera AOV y fondo di Pensioen APFA y Seguro Medico AZV cu ta worde haci sostenibel pa asina elimina riesgonan riba fondonan publico. “ Cu un economia creciente y gastonan publico teni den cuadranan palabra, Aruba den e siguiente 4 añanan aki pa prome bes den historia ta bay realisa un presupuesto na normanan internacional y lo ancra provisionnan pa sigura esaki den constitucion di nos pais.” Algo cu Eman a ripiti na varios occasion, pero den su discurso a subraya atrobe. Eman no a menciona e resultado di e rapport di Fitch Rating di diaranson, pero a mustra e exitonan di e prome pasonan ya ta wordo reconoci pa e rating agency mas renombra na mundo Standard & Poor’s.

 E situacion di e siman aki entre su persona y gobernador tambe a haya atencion. Eman ta lamenta cu apesar di un promesa serio na su persona cu dialuna e lo firma presupuesto 2014, Gobernador di Aruba no a cumpli cu e promesa aki. Segun Eman, e motibo pa esaki ta mes condenabel cu e echo riba su mes. “Un mal uso di poder cu hamas nos lo accepta. E diferencianan lo keda existi te ora respet mutuo regresa y autonomia y dignidad di nos Pueblo worde respeta”. Eman no a referi na e menasa contra gobernador, cu lo a bay sera si e firma e presupuesto. Segun Eman,“Aruba tampoco lo keda vulnerabel frente di e atropeyo aki. Nos tin mucho cosnan grandi y positivo ta desaroyando pa nos pais pa permiti cu e intransigencia aki di algun mandatario di Gobierno di Hulanda impedi e continuo desaroyo positivo di Aruba”. Decision di Ministernan Rutte y Plasterk pa prohibi Gobernador di Aruba pa firma e protocol ta keda un misterio,- segun Eman-, mirando con e situacion economico di Hulanda mes ta. Mandatarionan Hulandes pa logra loke ya nan kier a haya pa basta tempo caba, a dicidi pa medio di un decision den Conseho di Reino cu a bay contra tur regla existente pa impone un metemento envolve directo y unilateral di Reino den e derecho autonomo di stipula nos maneho prespuestario y financiero. Un atropeyo inacceptabel di e autonomia di nos pais pa cual generacionnan a duna nan bida, Eman a bisa. “Nos a tuma un postura di bida of morto pa defende e derecho sagrado di Aruba te ora nos haya oido”. Promesa a drenta di Gobernador cu dialuna cu a pasa presupuesto di pais Aruba lo wordo firma. Awe nos sa cu esaki ainda no a tuma lugar.