Trankilidat a bolbe na TeleCuraçao: Ta paga debe bieu di placa di vacantie

WILLEMSTAD - Trankilidat a regresá na TeleCuraçao, despues di negosiashonnan fuerte entre gerensia i sindikato ABVO. Finalmente a yega na e areglo ku pa awe djabièrnè, gerensia di TeleCuraçao lo paga trahadónan debe bieu di plaka di fakansi di aña pasá. Den deklarashon pa EXTRA, sr. Marlon Manuela di ABVO a trese dilanti ku ayera mainta nan a reuní pa 10 or di mainta ku gerensia di TeleCuraçao, huntu ku Sekretario General di VVRP sr. Dwigno Puriel, pa pèrkurá pa kosnan kana bon. E negoshashon no tabata fásil. Pasó gerensia a presentá mesun oferta ku sindikato a rechasá anteriormente kual ta 4.4% pago di lumpsum en bes di indexering, kaminda trahadónan a bisa no ta aseptá esaki. Tabatin deliberashon bai bin. Gerensia ke a para wèlga ora ta negoshá, i esaki no a keda aseptá. ABVO a pone otro proposishon i a bisa en bes di pago di 4,4%, a bisa gerensia paga plaka di fakansi di aña pasá. E otro debenan di aña pasa dia 4 yüli partidonan ta bai sinta p’asina duna kontenido na e artíkulo 5 di e protokòl, ku ta bisa ku tur luna gerensia i sindikato tin di sinta pa papia riba situashon finansiero. Pasobra ora yega pago na trahadó, nan ta kai chikí. Dia 4 yüli ta kuminsá papia di debenan i pa pone fechanan konkreto kon ta paga loke ku ATM debe trahadónan. Awe e pago di plaka di fakansi tin di tuma lugá. Mas aleu sr. Manuela a bisa ku trahadónan a indiká ku e direktor aki ta biaha mas tantu ku tur otro direktor, i ora yega pa paga trahadónan no tin sèn. Trahadónan ta traha overtaim sin kobra. Trahadó no por sigui entregá miéntras tin dispidimentu di plaka.NOTA: Texto ta scirbi den Papiamento fonetico di Corsou.