Awe desicion lo cai na Corsou si parlamento Rennox Calmes lo keda poni den libertad

WILLEMSTAD - Awe wes komisario lo disidí si e parlamentario Rennox Calmes i dos otro persona detené, ta keda poné den libertat, miéntras investigashon ta sigui kana. Djárason den oranan di mainta a bira konosí ku a detené Calmes pa falsifikashon di dokumento huntu ku dos otro persona mas. Un dje personanan aki ta su partner. Calmes a keda detené pa Landsrecherche Kòrsou, i tambe nan a realisá entradanan hudisial bou di guia di wes komisario na diferente bibienda, entre otro na kas di e parlamentario den Amerikanenkamp i den e ofisina di e parlamentario den edifisio di Parlamento na Punda. E entradanan hudisial a tuma lugá relashoná ku un investigashon penal di falsifikashon di dokumento. E sospecho di falsifikashon lo tin di aber ku slep di salario di e kolaboradó di Calmes den parlamento. Tin sospecho ku lo a falsifiká salario di e persona aki pa e por haña un salario mas haltu. Na momentu ku Calmes a drenta parlamento na 2021 djis despues tabatin un diskushon entre e tempu ei e kolaboradó di Calmes ku Calmes mes, pasobra lo mester a dun’é parti di su salario. El a retirá e kolaboradó aki, i a laga su partner bira su kolaboradó den parlamento ku e konsekuensia ariba menshoná. Awe ku tur probabilidat, wes komisario lo por laga Calmes den libertat, miéntras investigashon ta kontinuá. NOTA: Texto ta scirbi den Papiamento fonetico di Corsou.