Meteo tin bista riba Ola Tropical cu por bira Tormenta Beryl aki tres dia

MIAMI / ORANJESTAD – Tanto Meteo na Aruba como National Hurricane Center ta vigilando un ola tropical hopi di cerca, cu por bira e proximo tormenta cu nomber dentro di tres dia. Unabez cu e bira un tormenta, e lo haya e nomber di Beryl, cu ta e siguiente nomber riba e lista. E prome, Alberto, a forma te bay caba. Segun National Hurricane Center, e ola tropical tabatin 70% chens pa bira un tormenta den 7 dia, mientras 48% den 3 dia. Ayera e la desaroya hopi liher mes den algo mas solido, cu a pone cu National Hurricane Center mester a actualisa esaki tres biaha den un solo dia. 

METEO

Awe mainta tempran 6’or Meteo di Aruba a haci mencion di e sistema aki tambe pero brevemente, indicando si cu e ta moviendo den nos direccion (West) cu velocidad di 10 pa 15 nudo, y cu den dos dia e tin chens pa desaroya den un ciclon tropical.