TeleCuraçao tin programacion adaptá pasobra trahadonan ta welga

WILLEMSTAD - Atrobe tin situashon di trahadónan mal kontentu na TeleCuraçao. Por a tuma nota di esaki ayera nochi despues di Wega di Number Kòrsou. Pasobra riba e pantaya a sali e siguiente frase: “Debí na asuntunan laboral interno, TeleCuraçao su programashon ta sigui den forma adaptá”. No ta promé biaha ku e personal na e planta di televishon nashonal tin problema, i ta protestá di forma pasivo dor di no traha pa sierto programa por sigui manera ta e agènda. Un ehèmpel ta ku ayera nochi no tabatin e edishon di “Punto Final”. Den pasado tabatin mal kontentu, i e sindikato dje trahadónan ABVO a sinta na mesa ku e gerensia, i a sera un protokòl ku lo paga indexering, pero tambe sèn di fakansi. Sinembargo awor ku a yega ora pa pago di sèn di fakansi, gerensia lo a indiká na trahadónan ku lo no tin fondo pa pago di esaki. Esaki a pone ku trahadónan a disidí ku ta basta awor i a kuminsá ku akshon pasivo di no traha pa sierto programa bai “on air”.

Den deklarashon pa EXTRA, sr. Marlon Manuela di ABVO a konfirmá ku trahadónan di TeleCuraçao a drenta akshon debí ku gerensia debe nan hopi plaka. Gerensia debe nan plaka di fakansi, parti di indexering i plaka di gratifikashon. Aña pasa a firma protokòl pa den e promé seis (6) luna di e aña aki pa atendé e situashon, pero gerensia a keda bula pipa sin atendé. Awor a yega fin di luna, i trahadónan ke loke debe nan. Trahadónan a drenta den akshon. Trahadónan ta haña ku debe di tur hende ta ser paga, debe di nan si no ta ser kanselá. Gerensia ta keda bisa ku no tin sèn, pero ta mira sèn gasta na tur otro kos. NOTA: Texto ta scirbi den Papiamento fonetico di Corsou.