Reyes: Parlamento kier tende minister Oduber riba All-inclusive

ORANJESTAD – Parlamento kier tende minister di turismo Otmar Oduber riba e asunto di hotelnan all-inclusive. Como tal e mandatario a wordo invita pa un reunion dialuna merdia, pa duna cuenta riba e ultimo informacionan  riba e tema all-inclusive. Den su calidad di presidente di e comision permanente di turismo di parlamento, Jennifer Arends-Reyes a confirma esaki awe na NoticiaCla.com. 

EFECTO NEGATIVO

Arends-Reyes ta argumenta cu mirando cu tin mas hotel all-inclusive kier hasi nan entrada na Aruba den e area di high-rise hotels, esaki lo por tin un efecto negativo ariba nos sector Turistico. Ademas diferente rapport ta mustra cu un aglomeracion di hotelnan tipo All-inclusive tin su efectonan desventahoso pa e companianan cu ta depende directamente di e mesun turistanan. E ta recorda cu mientrastanto fraccion di AVP a tuma e iniciativa presenta dia 7 di mei 2015 y bin cu un mocion cu a carga sosten unanimamente di Parlamento dia 13 di mei 2015 pa urgi e mandatario en cuestion pa bin cu un ley urgente pa regla e sistema di permiso pa all-inclusive tambe na momento di un take-over.

CASO

E siman cu ta bin aki lo ta uno importante pa nos Turismo mirando cu lo tin decision den e caso sumario entama contra Carlson Group cu lo tin un acuerdo firma cu RIU pa un otro hotel All-inclusive ,mientras cu Carlson Group tawatin palabracionnan cu Aruba Growth Fund tambe. Aruba Growth Fund cu tawata bezig cu Carlson Group pa lunanan largo lo kier trece e cadena Hilton Aruba cu no lo ta e sistema di All-inclusive. Aruba Growth Fund a laga sa di ta desea di gana su caso a base di 'business ethics' y asina logra sinta bek na mesa di negociacion cu Carlson Group.

SHARES

Antes Land Aruba tawatin 'shares' den Radisson pero e la wordo bendi pa 41 miyon dollar tempo di MEP. E ora ey Land Aruba lo por tawatin mas di bisa na momento di compra of un 'take-over'. Awe e realidad ta otro. Segun Arends-Reyes, en todo caso parlamento y minister ta riba mesun liña y kier wak un maneho mas estringente pa cu hotelnan all-inclusive. Minister tin su plan pa con pa atende cu e trend di All-inclusive. Y segun Arends-Reyes, un aglomeracion di hotelnan All-inclusive no ta den plan di vision aki pa e area di high-rise. “ Y esaki nos lo tende dialuna awor durante di e reunion importante aki”. E ta spera cu esaki lo manda un señal pa e industria hotelero di e deseo como organo di mas halto di nos pais pa respeta nos vision pa cu nos turismo di nos isla. Lesa e aanbiedingsbrief aki.