Curatornan ta present plan pa asina JetAir por ta bek den operacion

WILLEMSTAD - A logra haña un solushon pa e problema di bankarota di JetAir. Si siman pasá e kompania aki no a gana simpatia di muchu hende den komunidat ku anunsio di su bankarota, tòg e siman aki ta habri ku notisia mas positivo, ya ku lo bai tin un reapertura na JetAir/United Caribbean Airlines BV pa asina tin un loke hurídikamente ta yama un “doorstart”. T’asina ku den transkurso di ayera e bufete di HBN Law & Tax a dirigí un karta na Minister di Desaroyo Ekonómiko sr. Ruisandro Cijntje, informando esaki dje interes di parti dje desaroyonan.

Den su karta e bufete di abogadonan ta bisa ku, pa medio di un disposishon di dia 18 di yüni 2024 United Caribbean Airlines BV huntu ku JetAir Caribbean a ser deklará den estado di bankarota, ku nombramentu di algun kurator. E ta splika ku di e pèrmit ku e kompania a risibí for di luna di aprel 2023. Pero djabièrnè último e kuratornan tabatin un kòmbersashon ku entre otro Minister Presidente i Minister di Hustisia. I durante dje kòmbersashon ei e importansia i interes di un kontinuashon di JetAir pa Kòrsou a ser tratá, i den esaki a papia di empleo, turismo i e konektividat den regio en general i e islanan di ABC en partikular. Gobièrnu i e kuratornan ta di akuerdo ku un kontinuashon lo sirbi interes general.

Mas aleu e ta bisa, ku ta algu positivo ku tin un kantidat di kandidato pa kontinuashon ku a mèldu nan mes serka e kuratornan, i e próksimo siman lo hiba kòmbersashon ku nan i konsekuentemente e kuratornan lo stipulá un asina yamá “bid book” ku ta kontené e regla i prosedura dje proseso di benta.

I manera ta usual den kasonan di bankarota, e kuratornan lo bende “as is where is” i sin garantia. E partido ku kumpli ku tur e kriterionan (di pèrmit) i ku duna e mihó oferta lo ser honrá despues di haña outorisashon di hues komisario i asina por dal bai ku kontinuashon di JetAir. Pues ta krusial ku ta bankarota di e kompania aki ta ser kitá, aunke ku hues komisario a bia di akuerdo kaba.

Den e mesun rosea den e karta ta pidi gobièrnu bai di akuerdo ku kitamentu dje bankarota, i un petishon similar ta bai tambe na direktor di SVB. I si tur kreditor bai di akuerdo ku lantamentu dje bankarota di United Caribbean Airlines BV, probablemente hues lo deklará ku e proseso tin base i asina e bankarota lo por ser kitá. Manera e situashon ta ne momentunan aki, e kuratornan lo traspasá e akshonnan (pues e pèrmitnan) pa e operador nobo, i dje forma ei e kompania di aviashon lo keda riba pia na Kòrsou. NOTA: Texto ta scirbi den Papiamento fonetico di Corsou.