Ministerio Publico a tuma decision tocante denuncia di De Ruijter

ORANJESTAD - Ministerio Publico a recientemente yega un decision final tocante e denuncia di señor Jan de Ruijter na december 2014 cerca Fiscal Mayor, relaciona cu supuesto iregularidadnan den e proyecto di construccion di Hard Rock Hotel. E denuncia aki ta encera, bisa en corto, cu señor De Ruijter ta di opinion cu e gunning di e proyecto di hotel na ‘Southwest Horeca Development’ tabata inhusto y cu ta trata di corupcion y falsificacion di documento. E denuncia ta dirigi contra gran cantidad di persona, entre nan, minister-president, minister di Turismo, minister di Infrastructura, como tambe e miembronan di e comision di evaluacion cu a dicidi tocante e destaho, e director di Southwest, y varios otronan.

DESICION

Ministerio Publico a dicidi pa no start un investigacion penal contra esnan contra kendenan señor De Ruijter a haci denuncia. Ministerio Publico ta basa su decision riba e conclusion cu no tin un sospecho rasonable di culpabilidad cu e personanan contra kendenan señor De Ruijter a haci denuncia, a haci nan mes culpable di algun hecho castigable. For di e documentonan cu señor De Ruijter a entrega na Ministerio Publico y otro documentonan riba cual Ministerio Publico ta dispone mientrastanto, no por conclui cu tabatin regalonan, promesanan o servicionan na minister di Turismo o cualkier otro ambtenaar. No a haya den e documentonan ningun iregularidad den e seleccion di e partinan cu a participa na e destaho of e proposicionnan pa e proyecto, ni den e concesion di e proyecto di construccion na Soutwest. E seleccion tabata habri y transparante y a tuma lugar dor di un comision di evaluacion independiente. Di nada ta sali cu tabatin trato preferencial pa Southwest. No tin ningun indicacion tampoco di iregularidadnan di banda di Southwest despues di e gunning di e proyecto. For di e documentonan no ta sali cu tabatin falsificacion di documentonan relaciona cu e garantianan di banco di Southwest.

KEHO

Fiscal Mayor y e fiscal cu a hiba e investigacion, a informa señor De Ruijter tocante e decision aki riba diamars ultimo. A mustré tambe riba e posibilidad pa entrega un keho contra e decision di Ministerio Publico na Corte Superior di Husticia.